ބިދޭސީންނާ ގުޅޭ ގާނޫނަށް ގެނައި އިސްލާހު ރައީސުލްޖުމުހޫރިއްޔާ ތަސްދީގު ކުރައްވައިފި

ވަޒީފާއާ ބެހޭ ގާނޫނަށް ގެނެވުނު އިސްލާހު ރައީސުލްޖުމުހޫރިއްޔާ ޑރ. މުހައްމަދު މުއިއްޒު އިއްޔެ ތަސްދީގު ކުރައްވައިފި އެވެ.

މި އިސްލާހުގެ ދަށުން، އެއް ގައުމަކުން ބިދޭސީ މަސައްކަތްތެރިން ގެނައުމަށް ގާނޫނުގައި ކަނޑައަޅާފައި އޮތް 100،000 މީހުންގެ އަދަދު އުވާލައި، ބިދޭސީން ރާއްޖެ ގެނައުމަށް ފަހު އިހުމާލުވާ ކޮންމެ މުވައްޒަފަކަށް 50،000 ރުފިޔާއިން ވަޒީފާ ދޭ ފަރާތް ޖޫރިމަނާ ކުރެވޭނެ އެވެ.

މިދިޔަ މަހުގެ 19 ވަނަ ދުވަހު ރައްޔިތުންގެ މަޖިލީހުން ފާސްކުރި މި ބިލު ރައީސް ތަސްދީގު ކުރެއްވުމާ އެކު، މިހާރު ވަނީ ސަރުކާރުގެ ގެޒެޓްގައި ޝާއިއުކޮށްފައެވެ. އަދި މިއިއްޔެއިން ފެށިގެން މި އިސްލާހުތަކަށް އަމަލުކުރަން ފަށައިފި އެވެ.

މި ބިލުގައިވާ އެންމެ ބޮޑު އެއް ބަދަލަކީ، ގާނޫނުގައި އޮތް ބިދޭސީން ރާއްޖެ އެތެރެ ކުރެވޭ ކޯޓާ އުވާލުމެވެ. ކުރިން އެއް ގައުމަކުން ބިދޭސީން ގެނެވޭނެ އަދަދު ސީދާ ގާނޫނުގައި ކަނޑައަޅާފައި އޮތް ނަމަވެސް، އާ އިސްލާހުގެ ދަށުން އެ އަދަދު ކަނޑައަޅާނީ ގާނޫނުގެ ދަށުން ހަދާ ގަވާއިދަކުންނެވެ.

ކޮމިޓީ މަރުހަލާގައި ބިލަށް ގެނެވުނު ބަދަލުތަކާ އެކު، ބިދޭސީން ގެނެވޭނެ އަދަދުތައް ގަވާއިދުގައި ކަނޑައެޅުމަކީ މިހާރު ކުރަންޖެހޭ ކަމެކެވެ. އަދި މި އަދަދުތައް ކޮންމެ އަހަރަކު ދެ ފަހަރު އާންމުކުރަންވާނެ އެވެ. މި ގަވާއިދު އެކުލަވާލުމުގެ ޒިންމާ އޮތީ ހޯމްލޭންޑް ސެކިއުރިޓީ މިނިސްޓްރީއަށެވެ. އަދި އަންނަ 1 ޑިސެމްބަރުގެ ކުރިން މި ގަވާއިދުތައް އެކުލަވާލަންޖެހޭނެ އެވެ.

މި އިސްލާހުގެ އަނެއް މުހިންމު ބަދަލަކީ ބިދޭސީންނާމެދު އިހުމާލުވާ ފަރާތްތަކަށް ހަރުކަށި ފިޔަވަޅު އެޅުމަށް ބާރު ދިނުމެވެ. އިހުމާލުވާ ފަރާތްތަކުގެ މައުލޫމާތު އާންމުކުރުމާއި، ކޮންމެ މުވައްޒަފަކަށް 50،000 ރުފިޔާގެ މަގުން ޖޫރިމަނާ ކުރުމާއި، ތަކުރާރުކޮށް އިހުމާލުވާ ފަރާތްތަކަށް ދެވޭ ޚިދުމަތްތައް ވަކި މުއްދަތަކަށް ހުއްޓާލުން ހިމެނެއެވެ.

އިހުމާލުގެ އަމަލުތަކުގެ ތެރޭގައި މުސާރަ ނުދިނުމާއި، ގާނޫނީ އަސާސީ ޙައްޤުތައް ނުދިނުމާއި، އެކްސްޕްލޮއިޓޭޝަންގެ އަމަލުތައް ހިންގުން ހިމެނެއެވެ. މީގެ އިތުރުން، ބިދޭސީންގެ ފީތައް ކޮންމެ ދޮޅު އަހަރަކުން ބޮޑުކުރެވޭ ގޮތަށްވެސް މި އިސްލާހުގައި ހިމަނާފައިވެއެވެ.