ބޭސްގެ ވަރުގަދަ އިސްނެގުމެއް - 11 ދާއިރާއަކުން ހޮޅުފަހި އެވޯޑް ދެނީ!

ހޮޅުދޫގެ މަދަނީ ޖަމްޢިއްޔާއެއްކަމަށްވާ، ބެޓަރ އެންވައަރަންމަންޓް ފޯރ ޔޫތްސޮސައިޓީ (ބޭސް) އިން އިސްނަގައިގެން “ހޮޅުފަހި އެވޯޑް” ގެ ނަމުގައި 11 ދާއިރާއަކުން އެވޯޑު ދިނުމަށް ނިންމައިފިއެވެ.

އެގޮތުން، ސިއްޙީ ދާއިރާ، ތަޢުލީމީ ދާއިރާ، ސައިންސް، ޓެކްނޮލޮޖީ، އިންޖިނިއަރިންގ ދާއިރާ، ފަތުރުވެރިކަމުގެ ދާއިރާ، އިމާރާތް ކުރުމުގެ ދާއިރާ، އަންހެނުންގެ ތަރައްޤީއަށް މަސައްކަތްކުރުމުގެ ދާއިރާ، މަސްވެެރިކަމާއި ދަނޑުވެރިކަމުގެ ދާއިރާ، މަސައްކަތްތެރިކަމާއި ފަންނުވެެރިކަމުގެ ދާއިރާ، އިޖްތިމާޢީ މަސައްކަތާއި، ހިލޭސާބަހަށް މަސައްކަތް ކުރުމުގެ ދާއިރާ، ކުދި އަދި މެދު ފަންތީގެ ވިޔަފާރީގެ ދާއިރާ، ކުޅިވަރާއި މުނިފޫހި ފިލުވުމުގެ ދާއިރާ އިން މި އެވޯޑު ދިނުމަށް ވަނީ ނިންމާފައެވެ.

ހޮޅުދޫ ކައުންސިލާ ގުޅިގެން ބާއްވާ އެ ވޯޑު ދިނުމުގެ ހަފްލާ ބޭއްވުމަށް ނިންމާފައިވަނީ މި މަހުގެ 6 ވަނަ ދުވަހުއެވެ.

ހޮޅުފަހި އެވޯޑަކީ މުޖްތަމަޢަށް އެކި ދާއިރާތަކުން ފަރުދުން ކުރާ މަސައްކަތާއި ،ގައުމީ ތަރައްޤީއަށާއި ، ޚާއްސަކޮށް ރަށު ތަރއްޤީއަށާއ،ި މުޖްތަމަޢު ބިނާ ކުރުމަށް ފަރުދުން އަދާކުރާ ދައުރުގެ އަގު ރަށު ފެންވަރުގައި ވަޒަންކުރުމުގެ ގޮތުންނާއ،ި މުވައްސަސާތަކާއ،ި ޖަމްޢިއްޔާ ޖަމާޢަތްތަކުން ކުރަމުންދާ މަސައްކަތްތަކުގެ އަގުވަޒަން ކުރުމުގެ ގޮތުން ދެވޭ ވަރަށް ޚާއްޞަ އެވޯޑެކެވެ.

މީގެ އިތުރުން، ރަށުގެ ތަރައްޤީއާއި ކުރިއެރުމަށް ކުރާ މަސައްކަތްތަކުގައި ފަރުދީ ފެންވަރުގައި ބައިވެރިވުން އިތުރުކުރުމާއި، އާންމު ފަރުދުން ކުރާ މަސައްކަތާއި ، ހާސިލުކޮށްފައިވާ ކާމިޔާބީތަށް ފާހަގަކޮށް އަގުވަޒަން ކުރުމާއި، ރަށަށް ހިދުމަތް ކުރުމަށް މީހުންގެ ޝައުގު އިތުރު ކުރުމަކީވެސް މި އެވޯޑު ތަޢާރަފް ކުރުމުގެ އެންމެ ބޮޑު އެއް މަޤްޞަދެވެ. ހަމައެހެންމެ، ޒުވާނުންގެ މެދުގައި އިސްނެގުމުގެ އާދަ ހަރުލައްވައި ، ހިލޭސާބަހަށް މަސައްކަތް ކުރުމުގެ ރޫޙު އުފެއްދުމަކީވެސް މި އެ ވޯޑުން ޙާޞިލްކުރަން ބޭނުންވާ އެއް ޢަމާޒެވެ.

ހޮޅުފަހި އެވޯޑް ކޮމެޓީ :

އަލްފާޞިލް އިސްމާޢިލް ޙަލީލް / ރެޑިއަމްވިލާ (ބެޓަރ އެންވައަރަންމެންޓް ފޯރ ޔޫތް ސޮސައިޓީ ތަމްސީލުކުރާ މެމްބަރު ).

އަލްފާޞިލް މުޙައްމަދު ޢަލީ / ބަހާރުގެ (ނ. ހޮޅުދޫ ކައުންސިލް އިދާރާ ތަމްސީލް ކުރާ މެމްބަރ ).

އަލްފާޞިލް މުޙައްމަދު އަފްރާޙް / އާހިޔާ (ނ.ހޮޅުދޫ ހެލްތް ސެންޓަރ ތަމްސީލްކުރާ މެމްބަރ ) .

އަލްފާޞިލާ އައިޝަތު ވަހީދާ / އިރުދޭމާގެ (މޭނާ ސްކޫލް ތަމްސީލްކުރާ މެމްބަރ ) .

އަލްފާޞިލާ އައިޝަތު ސިޒްލީން /ރެސްޓްޕޮއިންޓް (ނ.ހޮޅުދޫ ޑަބްލިއު.ޑީ.ސީ ތަމްސީލުކުރާ މެމްބަރ ) .

އަލްފާޞިލް އަބްދުﷲ ކާމިލް / ސާދާގެ (އާންމު މެމްބަރ )

ހޮޅުފަހި އެވޯޑުގެ ގޯލްޑް ސްޕޮންސަރަކީ ނ.ހޮޅުދޫ ފިޓްނަސް އެންޑް ރެކްރިއޭޝަން ސެންޓަރެވެ. ކޯ ސްޕޮންސަރަކީ އީ-ބުޓިކޯއެވެ. އިވެންޓް މެނޭޖްމަންޓް ޕާޓްނަރަކީ ޗެޓް މާރކް އިންޓީރިއާސްއެވެ. ޓެރެވެލް ޕާރޓްނަރަކީ ލެޖިއަން ޓްރެވެލްސް އެވެ. އޮންލައިން މީޑީޔާ ޕާޓްނަރަކީ ދެލި އެމްވީއެވެ.