ތޫފާން ޝަންޝަންގެ ސަބަބުން ޖަޕާނުގައި 6 މީހުން މަރުވެ 100 އަށް ވުރެ ގިނަމީހުންނަށް އަނިޔާވެއްޖެ

ފާއިތުވި އެތައް އަހަރަކަށްފަހު ޖަޕާނަށް ކުރިމަތިވި އެންމެ ވަރުގަދަ ތޫފާންތަކުގެ ތެރެއިން އެއް ތޫފާންކަމަށްވާ ޝަންޝަންގެ ސަބަބުން، މިހާތަނަށް 6 މީހުން މަރުވެ، 100 އަށްވުރެ ގިނަ މީހުންނަށް އަނިޔާވެފައިވާކަން ޖަޕާނުގެ ރަސްމީ ފަރާތްތަކުން ހާމަކޮށްފިއެވެ.

ބުރާސްފަތި ދުވަހު ޖަޕާނުގެ ދެކުނު-ހުޅަނގު ސަރަޙައްދަށް އެރި ތޫފާން ޝަންޝަންގެ ވައިގެ ބާރުމިން އެންމެ މަތީގައި ހުރީ ގަޑިއަކު 252 ކިލޯމީޓަރުގައެވެ. ނަމަވެސް މިހާރު ޓްރޮޕިކަލް ސްޓޯމަކަށް ބަދަލުވެފައިވާ ޝަންޝަންގެ ވައިގެ ބާރުމިން ގަޑިއަކު 90 ކިލޯމީޓަރުގައި ހިފެހެއްޓިފައިވެއެވެ.

ތޫފާން އައުމުގެ ކުރިން ޖަޕާނުގެ ދެކުނު ސަރަޙައްދުގެ މިލިއަނުން ގުނާލެވޭ އާބާދީއަށް އެންމެ މަތީ ފެންވަރުގެ އިންޒާރު ދެވުނެވެ. ތޫފާން އެރުމަށްފަހު އޭގެ ބާރު ކުޑަވެފައިވީ ނަމަވެސް، އަދިވެސް އުތުރު-އިރުމަތި ސަރަހައްދުތަކަށް ބޮޑެތި ގެއްލުންތައް ދަނީ ލިބެމުންނެވެ.

ޖަޕާނުގެ މޫސުމާބެހޭ އިދާރާއިން މަޢުލޫމާތު ދީފައިވާ ގޮތުގައި ކުރިއަށް އޮތް 24 ގަޑިއިރުގެ ތެރޭގައި ބައެއް ސަރަޙައްދުތަކަށް 300 މިލިމީޓަރަށް ވުރެ ގިނައިން ވާރޭވެހޭނެ ކަމަށް ލަފާކުރެވެއެވެ. އަދި ބިންގަނޑު ކަނޑައިގެން ދިއުމާއި، ފެންބޮޑުވުމާއި، އަދި ބޮޑެތި ގެއްލުންތަކަށް ރައްޔިތުން ސަމާލުވުމަށް އިންޒާރު ދީފައިވެއެވެ.

ތޫފާނުގެ ސަބަބުން އެތައް ޢިމާރާތްތަކެއް ހަލާކުވެ، ގަސްތައް ވެއްޓި، އަދި ކާރުތައް ފުރޮޅިގެން ގޮސް ނުވަތަ ފެނުގެ ތެރެއަށް ގެނބިފައިވާ މަންޒަރު ފެނެއެވެ. މީގެ އިތުރުން އެތައް ހާސް ގޭބިސީއެއްގެ ކަރަންޓު ކެނޑި، ޓްރޭނާއި މަތިންދާބޯޓުގެ ދަތުރުތައް ހުއްޓާލަން ޖެހިފައިވެއެވެ. ޓޯކިޔޯއާއި އޮސާކާ ދެމެދު ދުއްވާ ބުލެޓް ރެއިލްގެ ޚިދުމަތްތައްވެސް ހޮނިހިރު އަދި އާދީއްތަ ދުވަހުގެ ނިޔަލަށް މެދުކަނޑާލާފައިވާ ކަމަށް ރިޕޯޓުތަކުގައި ބުނެއެވެ.

ޖަޕާނުގެ ވެރިރަށް ޓޯކިޔޯގެ ރައްޔިތެއް ބުނެފައިވަނީ "މިއީ މުޅި ޖަޕާނަށް އަސަރުކުރާ ފަދަ ބާރުގަދަ ތޫފާނެއް، މިފަދަ ތޫފާނެއް އަހަރެން ދުށް މިއީ ފުރަތަމަ ފަހަރު" ކަމަށެވެ. އޭނާ އިތުރަށް ބުނެފައިވަނީ "ތޫފާންތައް އާންމުކޮށް އަންނަނީ އޮކިނާވާއިން އުތުރަށް. އެހެންވީމާ މިކަހަލަ ގޮތަކަށް ވާނެ ކަމަކަށް އުންމީދެއް ނުކުރަން. ވަރަށް ބޮޑަށް ހައިރާންވެއްޖެ" ކަމަށެވެ.

ސައިންސްވެރިން ބުނާ ގޮތުގައި މޫސުމަށް އަންނަ ބަދަލުތަކުގެ ސަބަބުން މި ސަރަޙައްދުގައި އުފެދޭ ތޫފާންތައް އެއްގަމާ ކައިރިވަމުންދާއިރު، އަދި އެއްގަމުގައި ދެމިހުންނަ މުއްދަތު ދިގުވަމުންދާ ކަމަށް ދިރާސާތަކުން ދައްކައެވެ. މިކަމުގެ ސަބަބުން މުސްތަޤުބަލުގައި މިފަދަ ނުރައްކާތެރި ތޫފާންތައް އިތުރުވެ، އޭގެ ނޭދެވޭ އަސަރުތައް ފުޅާވެގެންދާނެ ކަމަށް ބެލެވެއެވެ.