ޖަރުމަނު ލީގުގެ ޗެމްޕިއަން ލެވަކޫސަން 35 މެޗަށް ފަހު ބަލިވެއްޖެ

ޖަރުމަނު ލީގުގެ އެންމެ ފަހުގެ ޗެމްޕިއަން، ބަޔާ ލެވަކޫސަނުން 35 މެޗަށް ފަހު ލީގުގައި ފުރަތަމަ ފަހަރަށް ބަލިވެއްޖެ އެވެ.

ރޭ ކުޅުނު މެޗުގައި ލެވަކޫސަން ވަނީ އާރްބީ ލައިޕްޒިގު އަތުން 3-2 އިން ބަލިވެފައެވެ.

ލެވަކޫސަނުން އެ ކްލަބްގެ 120 އަހަރުވީ ދިގު ތާރީހުގައި ފުރަތަމަ ފަހަރަށް ޖަރުމަނު ލީގުގެ ޗެމްޕިއަންކަން ހޯދީ މިދިޔަ ސީޒަނުގައެވެ. އެއީ މެޗަކުން ބަލިނުވެއެވެ. އަދި ޖަރުމަނު ކަޕާއި ސުޕަ ކަޕް ވެސް ކާމިޔާބުކޮށްފައިވެއެވެ.

އަމިއްލަ ދަނޑުގައި ކުޅުނު ރޭ މެޗުގައި ލެވަކޫސަނުން ފުރަތަމަ ހާފު ނިންމާލީ ދެ ގޯލުގެ ލީޑެއްގައި އޮވެއެވެ. ނަމަވެސް ދެވަނަ ހާފުގައި ލައިޕްޒިގުން ޖެހި ތިން ގޯލާއެކު މެޗު ނިމުނީ ލައިޕްޒިގުގެ ކާމިޔާބީއާ އެކުގައެވެ.

މިއީ މިދިޔަ އަހަރުގެ މެއި މަހުގެ ފަހުން، ލެވަކޫސަން ޖަރުމަނު ފުޓްބޯޅައިގެ މެޗަކުން ބަލިވި ފުރަތަމަ ފަހަރެވެ. އަދި ޖަރުމަނުގެ ފުޓްބޯޅަ މުބާރާތެއްގެ މެޗަކުން ލެވަކޫސަން މި ބަލިވީ 43 މެޗަށް ފަހުއެވެ.

މި ފަހަރުގެ ސީޒަންގެ ތިން ވަނަ މެޗުން ލެވަކޫސަން މި ވަނީ ބައްޔަކާ ކުރިމަތިލާން ޖެހިފައެވެ. މިދިޔަ ސީޒަނުގައި، ލެވަކޫސަން ބަލިވި ހަމައެކަނި މެޗަކީ ޔޫރޮޕާ ލީގުގެ ފައިނަލުގައި އެޓަލަންޓާ އަތުންނެވެ.