ޒުވާން ޚަތީބުންގެ ދެވަނަ ބެޗުގެ 209 ބައިވެރިއަކަށް ސެޓްފިކެޓް ހަވާލުކޮށްފި

އިސްލާމިކް މިނިސްޓްރީން ހިންގާ ޒުވާން ޚަތީބުން ތަމްރީނު ކުރުމުގެ ޕްރޮގްރާމުގެ ދެވަނަ ބެޗު ނިންމާލުމުގެ ގޮތުން 209 ބައިވެރިންނަށް މިއަދު ސެޓްފިކެޓް ދީފިއެވެ.

އިސްލާމީ މަރުކަޒުގައި ބޭއްވުނު ޚާއްސަ ރަސްމިއްޔާތެއްގައި ޚަތީބުންނަށް ސެޓްފިކެޓް ހަވާލުކޮށްދެއްވީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި، އިސްލާމީ މަރުކަޒުގެ އިސް އިމާމު މުހައްމަދު ލަތީފް، ފަތުވާ މަޖިލީހުގެ މެމްބަރު އިލްޔާސް ހުސެއިން އަދި ސްޓޭޓް މިނިސްޓަރު ޑރ. މޫސާ އަންވަރެވެ.

މި ރަސްމިއްޔާތުގައި ވާހަކަފުޅު ދައްކަވަމުން އިސްލާމިކް މިނިސްޓަރު ވިދާޅުވީ ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން ކުރިއަށް ގެންދާ މި ޕްރޮގްރާމުގައި މިހާތަނަށް 300 އަށް ވުރެ ގިނަ ޒުވާނުން ބައިވެރިވެ ނިންމާފައިވާ ކަމަށެވެ. އަދި މިއީ މުޖުތަމައަށް ވަރަށް ބޭނުންތެރި ޕްރޮގްރާމެއް ކަމަށް އެމަނިކުފާނު ފާހަގަކުރެއްވިއެވެ.

މިނިސްޓަރު އިތުރަށް ވިދާޅުވީ މި ސަރުކާރުގެ އަމާޒަކީ މި ދައުރުގެ ތެރޭގައި 1000 ޚަތީބުން ތަމްރީނު ކުރުން ކަމަށާއި، އެ އަމާޒަށް ވާސިލުވެވޭނެ ކަމުގެ ފުރިހަމަ ޔަގީންކަން އޮތް ކަމަށެވެ. އަދި ވަރަށް އަވަހަށް މި ޕްރޮގްރާމުގެ ތިންވަނަ ބެޗު ފެށުމަށް ހަމަޖެހިފައިވާ ކަމަށްވެސް އޭނާ ހާމަކުރެއްވިއެވެ.

މި ޕްރޮގްރާމުގެ ދަށުން ހުތުބާ ކިޔުމާއި އިމާމުވެ ނަމާދުކުރުން ފަދަ ދީނީ އެހެނިހެން ތަމްރީނުތައްވެސް ދެވެއެވެ. ސްކޫލު ނިންމާފައިވާ ޒުވާނުންނާއި ގްރޭޑް 10 އިން ފެށިގެން މަތީ ގްރޭޑްތަކުގައި ކިޔަވާ ދަރިވަރުންނަށް މި ޕްރޮގްރާމުގައި ބައިވެރިވުމުގެ ފުރުސަތު ހުޅުވާލާފައިވެއެވެ.

މި ޕްރޮގްރާމަކީ ރާއްޖޭގައި ދީނީ ޢިލްމުވެރިން އިތުރުކޮށް، ޒުވާނުން ދީނީ ދާއިރާއަށް އަހުލުވެރިކުރުވުމަށް އިސްލާމިކް މިނިސްޓްރީން ކުރިއަށްގެންދާ މުހިންމު މަސައްކަތެކެވެ. މި ޕްރޮގްރާމުގެ ސަބަބުން ރާއްޖޭގެ އެކި ކަންކޮޅުތަކުގައި ހުރި މިސްކިތްތަކަށް ބޭނުންވާ ޤާބިލު ޚަތީބުންނާއި އިމާމުން އުފެއްދުމަށް މަގުފަހިވެގެންދާނެ ކަމަށް އުންމީދު ކުރެވެއެވެ. އަދި މިފަދަ ޕްރޮގްރާމުތަކުގެ ސަބަބުން ދިވެހި މުޖުތަމަޢުގައި އިސްލާމްދީނުގެ ޞައްޙަ މަޢުލޫމާތު ފެތުރި، ދީނީ ހޭލުންތެރިކަން އިތުރުވެގެންދާނެ ކަމަށްވެސް ބެލެވެއެވެ.