ކްރެޑިޓް ނުދޭތީވެ އާސަންދައިން ބެންގަލޫރުގެ ބައެއް ހޮސްޕިޓަލުތަކަށް ބަލިމީހުން ފޮނުވުން މެދުކަނޑާލައިފި

ކްރެޑިޓް ނުދޭތީވެ އާސަންދައިން ބެންގަލޫރުގެ ބައެއް ހޮސްޕިޓަލުތަކަށް ބަލިމީހުން ފޮނުވުން މެދުކަނޑާލައިފިއެވެ.

އާސަންދަ ކުންފުނީގެ މެނޭޖިންގ ޑިރެކްޓަރު އާމިނަތު ޒީނިޔާ ވިދާޅުވީ މިގޮތަށް ޢަމަލުކޮށްފައިވަނީ އެ ހޮސްޕިޓަލުތަކުން ކްރެޑިޓަށް ޚިދުމަތް ދިނުން ހުއްޓާލާފައިވާތީ ކަމަށެވެ.

ޒީނިޔާ ވިދާޅުވި ގޮތުގައި ކްރެޑިޓަށް ޚިދުމަތް ދިނުން ހުއްޓާލާފައިވާ ދެ ހޮސްޕިޓަލަކީ އެސްޓާ ސީއެމް އައި ހޮސްޕިޓަލް އަދި ސައިޓް ކެއާ ހޮސްޕިޓަލް ޕްރައިވެޓް ލިމިޓެޑެވެ. މީގެ އިތުރުން، ބެންގަލޫރުގެ މަނިޕާލް ހޮސްޕިޓަލުގެ އަގުތައް މުރާޖައާ ކުރާތީ އެ ހޮސްޕިޓަލަށް ވެސް ބަލިމީހުން ނުފޮނުވާ ކަމަށް ޒީނިޔާ ވިދާޅުވިއެވެ.

އާސަންދައިގެ ދަށުން ރާއްޖެއިން ބޭރުގެ ބައެއް ހޮސްޕިޓަލުތަކުން ފަރުވާ ހޯދެއެވެ. މިގޮތުން އެންމެ ގިނަ މީހުން ފަރުވާއަށް ދަނީ އިންޑިއާ އަދި ސްރީ ލަންކާ އަށެވެ.

ބެންގަލޫރުގެ ހޮސްޕިޓަލުތަކުގެ ތެރެއިން އާސަންދައިގެ ޚިދުމަތް މިހާރު ލިބޭ ހޮސްޕިޓަލުތަކުގެ ތެރޭގައި ދަ އައި ފައުންޑޭޝަން ސުޕަ ސްޕެޝަލިޓީ އައި ހޮސްޕިޓަލް، ކަޑަބަމްސް ހޮސްޕިޓަލް އެންޓަޕްރައިޒެސް، ސްޕާޝް ހޮސްޕިޓަލް، ރެއިންބޯ ޗިލްޑްރެންސް މެޑިކެއާ ޕްރައިވެޓް ލިމިޓެޑް، ސަކްރާ ވޯލްޑް ހޮސްޕިޓަލް، އެން ޔޫ ހޮސްޕިޓަލް (ވެސްޓް އަދި ސައުތު)، ނަރަޔާނާ ނެތްރަލަޔާ، ހެލްތް ކެއާ ގްލޯބަލް އެންޓަޕްރައިސެސް ލިމިޓެޑް، ބީޖީއެސް ގްލެނީގްލްސް ގްލޯބަލް ހޮސްޕިޓަލް އަދި އެޕޮލޯ ހޮސްޕިޓަލްސް ބެންގަލޫރު ހިމެނެއެވެ.

އާސަންދައިން އާންމުކޮށްފައިވާ އެންމެ ފަހުގެ ތަފާސް ހިސާބުތަކަށް ބަލާއިރު މި އަހަރުގެ ދެވަނަ ކުއާޓަރުގައި ޖުމްލަ 265,059 މީހުން އާސަންދައިން ޚިދުމަތް ހޯދި އިރު 2,807 މީހުން ރާއްޖެއިން ބޭރުން އާސަންދައިން ފަރުވާ ހޯދާފައިވެއެވެ.