ލޯނު އެއްބަސްވުމެއްގެ ދަށުން ސަންޗޯ ޗެލްސީއަށް ބަދަލުވެއްޖެ

މެންޗެސްޓަރ ޔުނައިޓެޑްގެ އިނގިރޭސި ވިންގާ ޖޭޑަން ސަންޗޯ ލޯނު އެއްބަސްވުމެއްގެ ދަށުން ޗެލްސީއަށް ބަދަލުވެއްޖެކަމަށް އިނގިރޭސި މީޑިއާތަކުން ރިޕޯޓުކޮށްފިއެވެ.

މި ބަދަލުވުމަކީ މި ސީޒަން ނިމެންދެން ދެމިގެންދާނެ ވަގުތީ ބަދަލުވުމެއްކަމަށާއި، މި އެއްބަސްވުމުގެ ދަށުން ޗެލްސީއިން 59.1 މިލިއަން ޑޮލަރު ދައްކަންޖެހޭނެކަމަށް ބުނެފައިވެއެވެ.

ސަންޗޯ މެންޗެސްޓަރ ޔުނައިޓެޑަށް ބަދަލުވެފައިވަނީ 2021 ވަނަ އަހަރުއެވެ. ނަމަވެސް ކޯޗު އެރިކް ޓެންހާގް އާއެކު ދިމާވި މައްސަލަތަކާ ގުޅިގެން ސަންޗޯއަށް ޓީމުގެ ފުރަތަމަ އެގާރައިގައި ކުޅުމުގެ ފުރުސަތު ގެއްލިފައިވެއެވެ. މިދިޔަ އަހަރުގެ ޖެނުއަރީ މަހު ސަންޗޯ ވަނީ ބުރޫޝިއާ ޑޯޓްމަންޑަށް ލޯނު އެއްބަސްވުމެއްގެ ދަށުން ބަދަލުވެފައެވެ.

މި ސީޒަނަށް ތައްޔާރުވުމުގެ ގޮތުން ޔުނައިޓެޑުން ކުޅުނު ބައެއް މެޗުތަކުގައި ސަންޗޯއަށް ފުރުސަތު ލިބުނު ނަމަވެސް، މި ސީޒަންގެ ފުރަތަމަ ދެ ލީގު މެޗުގައި އޭނާއަށް ފުރުސަތެއް ނުލިބުނެވެ. ސަންޗޯ މެންޗެސްޓަރ ޔުނައިޓެޑަށް ކުޅުނު 83 މެޗުން 12 ގޯލު ވަނީ ކާމިޔާބުކޮށްފައެވެ.