ޑަބްލިއު.އެޗް.އޯ އިން ޣައްޒާއަށް 1.2 މިލިއަން ޕޯލިއޯ ވެކްސިން ޑޯޒް ފޯރުކޮށްދީފި

ފަލަސްޠީނުގެ ޣައްޒާގައި ހަލުވިކަމާ އެކު ނުރައްކާތެރި ބައްޔެއް ކަމުގައިވާ ޕޯލިޔޯ ވައިރަސް ފެތުރުން ކޮންޓްރޯލް ކުރުމަށް ވެކްސިން ޖަހައިދިނުމަށް ކެމްޕޭނެއް ހިންގުމުގެ ގޮތުން، ދުނިޔޭގެ ސިއްހަތު ޖަމިއްޔާއިން ޣައްޒާއަށް ޕޯލިއޯ ވެކްސިންގެ 1.2 މިލިއަން ޑޯޒް ފޯރުކޮށްދީފައިވާ ކަމަށާއި، އިތުރު 400،000 ޑޯޒް ދޭން ޖެހޭ ކަމަށް އެ ޖަމިއްޔާއިން ބުނެފިއެވެ.

ކެމްޕޭނެއް ހިންގުމަށްޓަކައި، ޔަހޫދީ ފައުޖުތަކުން ހިންގަމުންދާ ލާއިންސާނީ ޢުދުވާންތައް ވަގުތީ ގޮތުން މެދުކަނޑައިލަން ވަނީ އެއްބަސްވެފައެވެ. މި ހަފުތާ ބަންދުގައި ފެށުމަށް ހަމަޖެހިފައިވާ ވެކްސިން ކެމްޕޭންގެ ދަށުން ޣައްޒާގައި ދިރިއުޅޭ 640,000 ވުރެން ގިނަ ކުޑަކުދިންނަށް ވެކްސިން ޖެހުމުގެ ފުރުސަތު ދިނުމުގެ ގޮތުން އެ ސަރަހައްދުގެ ބައެއް ސަރަހައްދުތަކުގައި ހިނގަމުންދާ ހަމަނުޖެހުންތައް ތިން ދުވަހަށް މެދުކަނޑާލާނެ އެވެ.  ފަލަސްޠީނުގެ ސަރަޙައްދުތަކަށް ކަނޑައަޅާފައި ހުންނަވާ ޑަބްލިޔުއެޗްއޯގެ އިސް އޮފިޝަލް ރިޗަރޑް ޕީޕަރކޯން ވިދާޅުވީ, ޣައްޒާގެ ވިކިވަކި ސަރަޙައްދުތަކުގައި ކޮންމެ ދުވަހަކު ވެސް ހެނދުނު 6ން މެންދުރުފަހު 3އަށް ޢުދުވާން ހިންގުން މެދުކަނޑައިލަން ޔަހޫދީ ފައުޖުން އެއްބަސްވެފައިވާ ކަމުގައެވެ. ކޮންމެ ކުއްޖަކަށް ވެކްސިންގެ ދެ ޑޯޒު ފުރިހަމަ ކޮށްދޭން ޖެހޭތީ, ވެކްސިން ކެމްޕޭން ކުރިއަށް ގެންދާނީ ދެ މަރުހަލާއަކަށް ބަހައިލައިގެންނެވެ.

ޑަބްލިއުއެޗްއޯގެ ޑިރެކްޓާ ޖެނެރަލް ޓެޑްރޯސް އަދަނޮމް ގެބްރިޔޭސުސް ވިދާޅުވީ އާދީއްތަ ދުވަހު ވެކްސިން ޖަހަން ފަށަން ހަމަޖެހިފައިވާ ކަމަށާއި، ކޮންމެ ދުވަހަކު ވެސް ހެނދުނު 6:00 އިން މެންދުރުފަހު 3:00 އަށް ވެކްސިން ދިނުމަށްޓަކައި، އުދުވާން ހިންގުން މެދުކަނޑާލުމަށް ހަމަޖެހިފައިވާ ކަމަށެވެ.  

މި ކެމްޕެއިން އިންތިޒާމްކޮށްފައި މިވަނީ ޓައިޕް 2 ޕޯލިއޯ ވައިރަހުގެ ސަބަބުން ތުއްތު ކުއްޖަކު ޕެރަލައިޒްވެފައިވާ ކަމަށް ޑަބްލިއުއެޗްއޯއިން މިމަހުގެ ކުރީކޮޅު ބުނުމާ ގުޅިގެން، އދ.ގެ އިދާރާތަކުން އަވަހަށް ވެކްސިން ޖެހުމަށް ބާރުއެޅުމުންނެވެ.

ވެކްސިން ކެމްޕޭން ކުރިއަށް ގެންދިއުމަށް އެތައް ސަތޭކަ ތަނެއްގައި 2،000 އަށް ވުރެ ގިނަ ސިއްހީ އެހީތެރިންނާއި އަދި ކޮމިއުނިޓީ ހެލްތު ވޯކަރުން ބައިވެރިވާނެއެވެ. މި ފަރާތްތަކުގެ ސަލާމަތާއި ރައްކާތެރިކަމާ މެދު ހުރި ކަންބޮޑުވުންތަކާބެހޭގޮތުން ވާހަކަ ދައްކަމުވުން، ޔުނިސެފްގެ އެގްޒެކެޓިވް ޑިރެކްޓަރު ކެތަރިން ރަސެލް ވިދާޅުވީ އިންސާނީ އެހީތެރިކަން ފޯރުކޮށްދިނުމަށްޓަކައި ހަނގުރާމަ ވަގުތީގޮތުން ހުއްޓާލުމަށް އެއްބަސްވެފައިވާ އެއްބަސްވުންތަކަށް އިހުތިރާމް ކުރަން ޖެހޭ ކަމަށެވެ.

"ހަނގުރާމަ މެދުކަނޑާނުލާފިނަމަ ޕޯލިއޯ ވެކްސިން ޖަހަންޖެހޭ ކުޑަކުދިންނާ ހަމައަކަށް ނުދެވޭނެ. އެކުދިންނަށް ވެކްސިނެއް ނުދެވޭނެ. ޣައްޒާއަކީ މިހާތަނަށް 25 އަހަރު ވަންދެން ޕޯލިއޯ ނައްތާލެވިފައިވާ ގައުމެއް. ހަނގުރާމަ މެދު ކަނޑާލުމުގެ އެއްބަސްވުމަށް އިހުތިރާމް ނުކުރުމަކީ ޣައްޒާއާއި މި ސަރަހައްދުގެ ކުޑަކުދިން މާފު ނުކުރާނެ ވަރުގެ ނާކާމިޔާބީއަކަށް ވާނެ، މިހާރުވެސް މިހާ ބޮޑު ތަކުލީފެއް ތަޙައްމަލު ކުރަމުން އަންނަނީ ކުޑަ ކުދިން." ކެތަރިން ރަސެލް ވިދާޅުވިއެވެ.

ޣައްޒާގައި ޕޯލިޔޯ ފެތުރުން ކޮންޓްރޯލް ކުރުމަށް ވެކްސިން ކެމްޕޭނެއް ފެށުމަށް ތައްޔާރުވަމުން މި ދަނީ, ނިކަމެތިކޮށް ހާލުގައި ޖައްސާފައިވާ މީހުންނަށް ކާބޯތަކެއްޗާއި އިންސާނީ އެހީތެރިކަން ފޯރުކޮށްދޭން އދން ކުރަމުންދާ މަސައްކަތްތައް މަޑުޖެހިފައިވާ ދަނޑިވަޅެއްގައެވެ. އެ މަސައްކަތްތަކަށް ހުރަސް އެޅުނީ, ދަޔިރް އަލް-ބަލަޙް ހުރަސް ކުރަން ޔަހޫދީ ފައުޖުން އެންގުމުންނެވެ. އެއާ އެކު, އެ ސަރަޙައްދުގައި ހަރަކާތްތެރިވަމުން ދިޔަ އދއާއި އެހީދޭ ޖަމުޢިއްޔާތަކުގެ ޓީމުތަކަށް ވެސް އިންސާނިއްޔަތަށް ޓަކައި ކުރަމުން ދިޔަ މަސައްކަތްތައް ހުއްޓައިލުމަށް ފަހު އެ ސަރަޙައްދުން ފައިބަން ޖެހުނެވެ.

ޖުލައި 23 ވަނަ ދުވަހު ޔުނިސެފުން ބުނީ އެ ޖަމާޢަތުގެ ދެ އުޅަނދެއް މަޑުކުރަން ކަނޑައަޅާފައިވާ ޕޮއިންޓެއްގައި މަޑުކޮށްގެން ތިއްބާ އެއުޅަނދުތަކަށް ލައިވް ވަޒަނުން ހަމަލާދީފައިވާކަމަށެވެ.