ވިސާ ފުރިހަމަ ނޫން 273 ބިދޭސީންނަށް ނޯޓިސް ދީފި

ވިސާނެތް ބިދޭސީންނަށް ނޯޓިސްދިނުން / ފޮޓޯ:އިމެގްރޭޝަން

މާލެ ސަރަހައްދުގައި ޤަވާއިދާ ޚިލާފަށް ދިރިއުޅޭ ބިދޭސީން ދެނެގަތުމަށް މިދިޔަ ބުދަ ދުވަހު މޯލްޑިވްސް އިމިގްރޭޝަނުން ހިންގި ޚާއްސަ އޮޕަރޭޝަނެއްގައި ވިސާ ފުރިހަމަ ނޫން 273 ބިދޭސީންނަށް ނޯޓިސް ދީފައިވާ ކަމަށް އެ އިދާރާއިން ހާމަކޮށްފިއެވެ.

މި އޮޕަރޭޝަނުގައި މާލޭގެ 582 ތަނެއް ބަލައި ފާސްކޮށް، 1،025 ބިދޭސީންނާ ސުވާލުކޮށްފައިވާ ކަމަށް އިމިގްރޭޝަނުން ބުނެފައިވެއެވެ. އަދި ގަވާއިދާ ޚިލާފަށް ބިދޭސީން ލައްވާ މަސައްކަތްކުރުވި 120 ދިވެހިންނަށް ލިޔުމުން ނަސޭހަތް ދީފައިވާ ކަމަށްވެސް އެ އިދާރާއިން ބުނެފައިވެއެވެ.

މީގެ އިތުރުން، ރާއްޖޭގައި ފިލައިގެން އުޅޭ ކަމަށް ރިޕޯޓު ކޮށްފައިވާ ބިދޭސީންގެ ތެރެއިން 10 މީހަކު ހޯދައި، އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށް އިމިގްރޭޝަނުން މަޢުލޫމާތު ދީފައިވެއެވެ.

މި އޮޕަރޭޝަން ކުރިއަށް ގެންދިޔައީ 211 އިމިގްރޭޝަން އޮފިސަރުން 52 ގްރޫޕަކަށް ބަހާލައިގެންނެވެ. އަދި މި އޮޕަރޭޝަން ކުރިއަށް ގެންދިޔައީ ދެ ގަޑިއިރުގެ މުއްދަތަށް ކަމަށް އިމިގްރޭޝަނުން ބުނެފައިވެއެވެ.

އިމިގްރޭޝަން