މަސްތުވާތަކެއްޗާއި އެކު މިއަދުވެސް ވީއައިއޭ އިން މީހަކު ހައްޔަރުކޮށްފި

ވެލާނާ އިންޓަނޭޝަނަލް އެއާޕޯޓުން (ވީއައިއޭ) ރާއްޖެއިން ބޭރަށް ދަތުރުކުރަން އުޅުނު ފަސިންޖަރެއްގެ އަތުން މަސްތުވާތަކެތި ފެނި، އެ ފަރާތް ހައްޔަރުކޮށްފިއެވެ.

މިކަން ހިނގާފައިވަނީ މިއަދު 3:45 ގައި އިންޑިގޯ އެއަރލައިންސްގެ E6 1132 ފްލައިޓުން ދަތުރުކުރަން އުޅުނު ފަސިންޖަރެއްގެ އަތުންނެވެ. އޭވިއޭޝަން ސެކިއުރިޓީ ކޮމާންޑުގެ މުވައްޒަފުން އެ ފަރާތް ބަލައި ފާސްކުރުމުގެ ތެރޭގައި މަސްތުވާތަކެތި ކަމަށް ޝައްކުކުރެވޭ ދެ ޕެކެޓް ފެނިފައިވެއެވެ.

އޭވިއޭޝަން ސެކިއުރިޓީ ކޮމާންޑުން އިޖުތިމާއީ ވިއުގަ އެކްސްގައި ކުރި ޕޯސްޓެއްގައި މި މަޢުލޫމާތު ހިއްސާކޮށްފައިވެއެވެ. އަދި މަސްތުވާތަކެތި އަތުން ފެނުނު ފަސިންޖަރު މިހާރު ވަނީ ކަމާބެހޭ އިދާރާތަކާ ހަވާލުކޮށްފައިކަމަށް އެ ކޮމާންޑުން ބުނެފައިވެއެވެ.

ނަމަވެސް، މި މައްސަލައިގައި ހައްޔަރުކުރެވުނު ފަރާތަކީ ދިވެއްސެއްކަން ނުވަތަ ބިދޭސީއެއްކަން އަދި ހާމަކޮށްފައެއް ނުވެއެވެ. އަދި ހަމައެހެންމެ، އަތުލެވުނު މަސްތުވާތަކެތީގެ ބާވަތާއި މިންވަރުގެ ތަފްސީލު ވެސް އަދި އާންމުކޮށްފައެއް ނުވެއެވެ.