ހުޅުމާލޭގައި 15 ޕާކިން އިމާރާތް އެޅުމަށް ހުޅުވާލައިފި

ހުޅުމާލޭގައި 15 ޕާކިން އިމާރާތް ތަރައްގީކުރުމަށް ޝައުގުވެރިވާ ފަރާތްތަކަށް އެ ފުރުސަތު ހުޅުވާލައިފިއެވެ.

މި މަޝްރޫޢުއަކީ ހުޅުމާލޭގެ ޕާކިން މައްސަލައަށް ހައްލު ހޯދުމަށް ކުރިއަށް ގެންދާ މަސައްކަތުގެ ތެރެއިން ހިންގާ މަޝްރޫޢުއެއް ކަމަށް ހުޅުމާލެ ބަލަހައްޓާ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނެފައިވެއެވެ.

މި އިމާރާތްތަކުގައި ވެހިކަލްތަކަށް ރައްކާތެރިކޮށް ޕާކުކުރެވޭނެ އިންތިޒާމުގެ އިތުރުން ކޮމާޝަލް ޔުނިޓުތައް ވެސް ހިމެނޭނެ ކަމަށް އެޗްޑީސީން މަޢުލޫމާތު ދީފައިވެއެވެ. މި މަޝްރޫޢު ހިންގުމަށް ހަވާލުކުރާއިރު އިސްކަންދޭނީ އީޕީސީ ޕްލަސް އެފް (އިންޖިނިއަރިންގ، ޕްރޮކިއުމަންޓް، ކޮންސްޓްރަކްޝަން އަދި ފައިނޭންސް) މޮޑެލްއަށް ކަމަށްވެސް އެޗްޑީސީން ބުނެފައިވެއެވެ. ނަމަވެސް، އެކްސްޕްރެޝަން އޮފް އިންޓަރެސްޓް (އީއޯއައި) ހުށަހަޅާއިރު އެހެން މޮޑެލްތަކަށް ވެސް ހުށަހެޅުމުގެ ފުރުސަތު އޮންނާނެއެވެ.

އެއް ފަރާތަށްވުރެ ގިނަ ފަރާތުން މި މަޝްރޫޢުއަށް ޝައުގުވެރިކަން ފާޅުކޮށް ޕްރޮޕޯސަލް ހުށަހަޅައިފިނަމަ، މަޝްރޫޢު ހަވާލުކުރާނީ އެންމެ ފުރިހަމަ ޕްރޮޕޯސަލް ހުށަހަޅާ ފަރާތަކަށް ކަމަށް އެޗްޑީސީން ހާމަކޮށްފައިވެއެވެ. އީއޯއައިތައް އިވެލުއޭޓް ކުރުމުގައި ޕްރޮޕޯސްކޮށްފައިވާ ބިޒްނަސް މޮޑެލްއާއި، އޮޕަރޭޓަރުގެ ތަޖުރިބާ އަދި ކޯޕަރޭޓް ސޯޝަލް ރެސްޕޮންސިބިލިޓީ (ސީއެސްއާރ) އަށް ބަލާނެ ކަމަށްވެސް ބުނެފައިވެއެވެ.

ހުޅުމާލޭގައި އުޅަނދު ޕާކުކުރުމަށް ވަކި ސަރަހައްދުތަކެއް ޚާއްޞަކޮށް، ކުލި ދައްކައިގެން އަދި ނުދައްކާ ގޮތަށް ވެސް ޕާކުކުރާނެ ޖާގަ ހަމަޖައްސަން ނިންމާފައިވާ ކަމަށް އެޗްޑީސީ އިން ވަނީ މީގެ ކުރިން ބުނެފައެވެ.

މި 15 ޕާކިން އިމާރާތް އެޅުމުގެ މަޝްރޫޢުއަކީ ހުޅުމާލޭގެ ޕާކިން މައްސަލައަށް ދާއިމީ ހައްލެއް ހޯދުމަށް އެޅޭ މުހިންމު ފިޔަވަޅެއް ކަމަށް ބެލެވެއެވެ.