ރަޝިއާއިން އެމެރިކާގެ 92 މީހަކަށް އެ ގައުމަށް ވަނުން މަނާކޮށްފި

ރަޝިއާގެ ރައީސް

ރަޝިއާއިން އެމެރިކާގެ އިތުރު 92 މީހަކަށް އެ ގައުމަށް ވަނުން މަނާކޮށްފިއެވެ.

ރަޝިއާގެ ޚާރިޖީ ވުޒާރާގެ ލިސްޓުގައި ވާގޮތުން ރަޝިއާއިން ވަނީ 2،000 އަށްވުރެ ގިނަ އެމެރިކާ މީހުން އެ ގައުމަށް ވަނުން މަނާކޮށްފައެވެ. މި ފިޔަވަޅަކީ އެމެރިކާއިން ރަޝިއާއަށް އަމާޒުކޮށްފައިވާ ފިޔަވަޅުތަކަށް ރައްދު ދިނުމުގެ ގޮތުން އަޅާފައިވާ ފިޔަވަޅެއް ކަމަށް ރަޝިއާއިން ބުނެއެވެ.

ރަޝިއާގެ ޚާރިޖީ ވުޒާރާއިން ބުނެފައިވަނީ، މިއީ އެމެރިކާގެ ރައީސް ޖޯ ބައިޑަން އިއުލާނުކުރެއްވި ރަޝިއާއަށް ނަފުރަތު ކުރުވުމުގެ ޕްރޮގްރާމަށް ރައްދު ދިނުމުގެ ގޮތުން އަޅާފައިވާ ފިޔަވަޅެއް ކަމަށެވެ. އެ ވުޒާރާއިން ބުނެފައިވާ ގޮތުގައި، މިހާރު ރަޝިއާއަށް ވަނުން މަނާކޮށްފައިވާ ނޫސްވެރިން ދިޔައީ ރަޝިއާއާއި ރަޝިއާގެ ހަތިޔާރު އެޅި ސިފައިންނާބެހޭ ގޮތުން ދޮގު މައުލޫމާތު ފަތުރަމުންނެވެ.

މިގޮތަށް ވަނުން މަނާކޮށްފައިވާ މީހުންގެ ތެރޭގައި ރަޝިއާގައި ކުރިން މަސައްކަތްކުރި ނޫސްވެރިންނާއި، އެމެރިކާގެ ގާނޫނު ތަންފީޒުކުރާ ފަރާތްތަކާއި ވިޔަފާރިވެރިން ހިމެނެއެވެ. ރަޝިއާއިން އާންމުކޮށްފައިވާ ލިސްޓުގައި ވޯލް ސްޓްރީޓް ޖާނަލްގެ މިހާރުގެ ނުވަތަ ކުރީގެ 11 މުވައްޒަފުން ހިމެނެއެވެ. އޭގެ ތެރޭގައި އެ ނޫހުގެ އެޑިޓަރު އެމާ ޓަކަ ވެސް ހިމެނެއެވެ.

މީގެ އިތުރުން، ނިއުޔޯކް ޓައިމްސްގެ ފަސް ނޫސްވެރިއެއްގެ އިތުރުން ދަ ވޮޝިންޓަން ޕޯސްޓުގެ ހަތަރު ނޫސްވެރިއަކަށް ވެސް ރަޝިއާއަށް ވަނުން ވަނީ މަނާކޮށްފައެވެ. މި ފިޔަވަޅުތަކުން ދޭހަވަނީ ރަޝިއާއާއި އެމެރިކާ ދެމެދު އޮތް ގުޅުން އިތުރަށް ގޯސްވަމުންދާކަމެވެ.

ރަޝިޔާ