ރިސޯޓުތަކުގެ މުއްދަތު އިތުރުކުރުމަށް ދައްކަންޖެހޭ އަގު ދެގުނަ ކުޑަކޮށް، ގާނޫނަށް އިސްލާހު ގެނެވިއްޖެ

ރާއްޖޭގެ އިޤްތިސާދު ރަނގަޅުކުރުމަށް މި ސަރުކާރުން ގެންދަނީ އަވަސް ފިޔަވަޅުތަކެއް އަޅުއްވަމުން / ފޮޓޯ:ރައީސް އޮފީސް

ރިސޯޓުތައް ކުއްޔަށް ދޫކޮށްފައިވާ މުއްދަތު އިތުރުކުރުމަށް ކުރިން ދައްކަން ޖެހޭ އަގަށް ވުރެ ދެ ގުނަ ކުޑަ ވާނެ ގޮތަށް ސަރުކާރުގެ ފަރާތުން މިދިޔަ ހަފްތާގައި ޓޫރިޒަމް ގާނޫނަށް ހުށަހެޅި އިސްލާހު، ރައީސް މުހައްމަދު މުއިއްޒު މިއަދު ތަސްދީގު ކުރައްވައިފި އެވެ.

ރިސޯޓުތައް ކުއްޔަށް ދޫކޮށްފައިވާ މުއްދަތު އިތުރުކުރަން ވަކި މުއްދަތަކަށް ކުޑަ އަގެއް ދެއްކޭ ގޮތް ހަދަން ޓޫރިޒަމް ގާނޫނަށް ސަރުކާރުގެ ފަރާތުން ހުށަހެޅި އިސްލާހުގެ މަސައްކަތް އެއް ދުވަސް ތެރޭ ނިންމައި، މަޖިލީހުން އެ ބިލު ފާސް ކުރީ މިދިޔަ ހަފްތާ ހޯމަ ދުވަހު އެވެ.

އެ ބިލު ރައީސް ތަސްދީގުކުރައްވައި، ގެޒެޓްގައި މިހާރު ވަނީ ޝާއިއުކޮށްފަ އެވެ. އެއާ އެކު، މިއަދުން ފެށިގެން އެ އިސްލާހަށް އަމަލު ކުރަން ފެށުނީ އެވެ.

މިހާރު ގެނެވުނު އިސްލާހާ އެކު، 49 އަހަރަށް ވުރެ ކުޑަ މުއްދަތަކަށް އިތުރު ކުރާ ނަމަ، ދައްކަން ޖެހެނީ އަހަރަކަށް 100،000 ޑޮލަރެވެ. ނަމަވެސް ހަ މަހަށް ފަހު، ދައްކަން ޖެހެނީ 200،000 ޑޮލަރެވެ.

ހަ މަހުގެ މުއްދަތު ގުނާނީ، ރައީސް ބިލް ތަސްދީގު ކުރެއްވުމާ އެކު ސަރުކާރުގެ ގެޒެޓްގައި ޝާއިއުކުރާ ދުވަހުން ފެށިގެން ކަމަށް ބަޔާންކޮށްފައިވެ އެވެ.

އެހެން ކަމުން އަންނަ އަހަރުގެ ފެބްރުއަރީ 29ގެ ނިޔަލަށް ރިސޯޓުތަކުގެ މުއްދަތު އިތުރު ކުރުމަށް ހުށަހަޅާ ހުށެހެޅުންތަކަށް މި ލުއިތައް ލިބޭނެ އެވެ. މިއީ ރާއްޖޭގެ ޓޫރިޒަމް ސިނާއަތަށް ލިބޭނެ ވަރަށް ބޮޑު ލުޔެއް ކަމަށް ބެލެވެއެވެ.

ރައީސް ޑރ މުޙައްމަދު މުޢިއްޒު ރައީސް އޮފީސް