ފެނަކަ އެސްޓީއޯގެ ދަށަށް ބަދަލުކޮށް ފައިދާވާ ކުންފުންޏަކަށް ހަދަން ނިންމައިފި

ފެނަކަ ކޯޕަރޭޝަން ލިމިޓެޑް (ފެނަކަ) އަކީ ފައިދާވާ ކުންފުންޏަކަށް ހަދާނެ ކަމުގެ ޔަގީންކަން ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ދީފިއެވެ.

އެސްޓީއޯއިން މިއަދު ނެރުނު އިއުލާނެއްގައި ބުނެފައިވަނީ، ފެނަކަ އެ ކުންފުނީގެ ސަބްސިޑަރީއަކަށް ބަދަލުކުރަނީ އެސްޓީއޯއިން ސަރުކާރަށް ހުށަހެޅި ޕްރޮޕޯސަލްއަކަށް ބިނާކޮށް، ކެބިނެޓުން ނިންމައިގެން ކަމަށެވެ.

އެސްޓީއޯއިން ބުނެފައިވަނީ، އަންނަ އަހަރުން ފެށިގެން ފެނަކައަކީ އެސްޓީއޯގެ ސަބްސިޑަރީއަކަށް ބަދަލުކުރުމަށް ނިންމާފައިވާ ކަމަށާއި، މި މަސައްކަތް ކުރުމަށް ފެނަކަ އާއި ފިނޭންސް މިނިސްޓްރީ ގުޅިގެން ޕްލޭނެއް އެކުލަވާލާނެ ކަމަށެވެ. މި ޕްލޭންގެ ދަށުން ފެނަކައިގެ ހާލަތު ދެނެގަތުމަށް ފައިނޭންޝަލް އަދި ލީގަލް ޑިއު ޑެލިޖެންސް ހަދައި، ހަރުމުދާ އަގުކޮށް މާލީ ހާލަތު ދެނެގަންނާނެ ކަމަށް ބުނެފައިވެއެވެ.

އެސްޓީއޯއިން އިތުރަށް ބުނެފައިވަނީ، ފެނަކައިގެ އިންޓަރިމް ބޯޑު އެކުލަވާލާނީ އެސްޓީއޯ، ފިނޭންސް މިނިސްޓްރީ އަދި އެންވާރަމަންޓް މިނިސްޓްރީ ތަމްސީލު ކުރާ ފަރާތްތައް ހިމެނޭ ގޮތަށް ކަމަށެވެ. އަދި ފެނަކަ މުޅިން އެސްޓީއޯގެ ދަށަށް ބަދަލުވުމުން، ޑިރެކްޓަރުންގެ ބޯޑު އެކުލަވާލާނީ އެސްޓީއޯގެ ގަވަރނަންސް ކޯޑާ އެއްގޮތަށް ކަމަށްވެސް ބުނެފައިވެއެވެ.

ފެނަކައިގެ ދަރަނީގެ ބޮޑު ބައެއް އެސްޓީއޯ ގްރޫޕަށް ދައްކަންޖެހޭ ފައިސާ ކަމަށާއި، މި ފައިސާ ހޯދުމަށް ޕްލޭނެއް ހަދައި، ފެނަކަ ފައިދާވާ ކުންފުންޏަކަށް ހެދުމަށް މަސައްކަތްކުރާނެ ކަމުގެ ޔަގީންކަން އެސްޓީއޯއިން ދީފައިވެއެވެ.