ބަގާވާތުގެ ތުހުމަތުގައި ފުލުހުން ތަޙުޤީޤު ފަށައިފި

ބޭންކް އޮފް މޯލްޑިވްސް (ބީއެމްއެލް) އިން މިދިޔަ އާދިއްތަ ދުވަހު ނިންމި ނިންމުމާ ގުޅިގެން ސަރުކާރު ބަދަލުކުރަން މަސައްކަތް ކޮށްފައިވާ ކަމަށް ތުހުމަތުކުރެވޭ މައްސަލައިގެ ތަޙުޤީޤު ފުލުހުން ވަނީ ފަށައިފައެވެ.

ފުލުހުން މިއަދު ނެރުނު ބަޔާނެއްގައި ބުނެފައިވަނީ މި މައްސަލައިގައި ފިޔަވަޅު އަޅަންޖެހޭ ފަރާތްތައް ދެނެގަތުމުގެ މަސައްކަތް ކުރަމުންދާ ކަމަށެވެ. އަދި މައްސަލައާ ގުޅޭ އެންމެހައި މަޢުލޫމާތު އެއްކުރުމާއި، ބަލަންޖެހޭ ކަންކަން ތަފްސީލުކޮށް ދިރާސާކުރުމުގެ މަސައްކަތް ކުރަމުންދާ ކަމަށްވެސް ފުލުހުން ބުނެފައިވެއެވެ. ނަމަވެސް، މިހާތަނަށް އެއްވެސް ފަރާތަކަށް ފިޔަވަޅު އަޅާފައިވާކަން ފުލުހުން ހާމަކޮށްފައެއް ނުވެއެވެ.

މި މައްސަލައިގެ ފެށުމަކީ މިދިޔަ އާދިއްތަ ދުވަހުގެ ހެނދުނު ބީއެމްއެލްއިން ރުފިޔާ އެކައުންޓްތަކުން ބޭރުގައި މުޢާމަލާތް ނުކުރެވޭ ގޮތަށް ނިންމި ނިންމުމެވެ. އެ ނިންމުމާ ގުޅިގެން އާންމުންގެ ފާޑުކިޔުންތައް އިތުރުވުމާއެކު، މޯލްޑިވްސް މަނިޓަރީ އޮތޯރިޓީގެ އެންގުމަށް ބީއެމްއެލްއިން އެ ދުވަހުގެ ހަވީރު އެ ނިންމުން ބާޠިލުކުރިއެވެ.

ރައީސް މުޙައްމަދު މުޢިއްޒު އަދި ސަރުކާރުގެ އިސް ފަރާތްތަކުން މި މައްސަލަ ސިފަކުރައްވަނީ "މާލީ ބަޣާވާތެއް" ގެ ގޮތުގައެވެ. އަދި ޤާނޫނުއަސާސީގައިވާ ގޮތުގެމަތިން ކުށްވެރިވާ ފަރާތްތަކާމެދު ފިޔަވަޅު އަޅުއްވާނެ ކަމަށް ރައީސް ވިދާޅުވެފައިވެއެވެ.

ބީއެމްއެލްގެ ނިންމުން ނިންމާފައިވަނީ އިދިކޮޅު ފަރާތްތަކާ ގުޅިގެން ކަމަށް ސަރުކާރުގެ ބައެއް ވަޒީރުން ތުހުމަތުކުރައްވާފައިވުމެވެ. އަދި ބީއެމްއެލްގެ ނިންމުމާ ދިމާކޮށް، ސިޔާސީ ފަރާތްތަކުން ސަރުކާރުގެ މާލީ ހާލަތާ ގުޅޭ ގޮތުން ނޫސްވެރިންގެ ބައްދަލުވުމެއް ބާއްވައި، ރައްޔިތުންނަށް ނުބައި މަޢުލޫމާތު ދެމުން ދިޔަ ކަމަށް ފުލުހުން ވެސް ވަނީ ބުނެފައެވެ.