ކޮލްކަތާގައި ޑޮކްޓަރަކު ރޭޕްކޮށް މަރާލި މައްސަލާގައި މުޒާހަރާތައް ހޫނުވެ 100 އަކަށް މީހުން ހައްޔަރުކޮށްފި

އިންޑިއާގެ ކޮލްކަތާގައި ޑޮކްޓަރަކު ރޭޕްކޮށް މަރާލި މައްސަލާގައި އިންސާފަށް އެދި ކުރަމުން ގެންދާ ސިލްސިލާ މުޒާހަރާތައް ހޫނުވެ، މަދުވެގެން 100 އަށް ވުރެ ގިނަ މީހުން ހައްޔަރުކޮށްފިއެވެ.

ކޮލްކަތާގެ ސަރުކާރު ހޮސްޕިޓަލެއްގައި މި މަހުގެ ކުރީކޮޅު، 31 އަހަރުގެ އަންހެން ޑޮކްޓަރަކު ރޭޕްކޮށް މަރާލި މައްސަލައާ ގުޅިގެން، މަސައްކަތުގެ މާހައުލުގައި އަންހެނުންނަށް ރައްކާތެރިކަން ކަށަވަރުކޮށްދިނުމަށް ގޮވާލައި އެތައް ހާސް ބަޔަކު ވަނީ ސިލްސިލާކޮށް މުޒާހަރާކުރަން ފަށާފައެވެ.

އިންޑިއާގެ މީޑިއާތަކުން ރިޕޯޓުކޮށްފައިވާ ގޮތުގައި މިއަދުގެ މުޒާހަރާގައި ވެސް އެތައް ހާސް ބަޔަކު ބައިވެރިވިއެވެ. މުޒާހަރާގެ ބައިވެރިން ދިޔައީ ވެސްޓް ބެންގާލްގެ ޗީފް މިނިސްޓަރު މަމަތާ ބެނާރްޖީގެ އިސްތިއުފާއަށް ގޮވާލަމުންނެވެ.

މުޒާހަރާގެ ބައިވެރިން ސަރުކާރުގެ އިމާރާތަކާ ދިމާލަށް މިސްރާބު ޖެހުމާ އެކު، ފުލުހުން ވަނީ މުގުރުން ހަމަލާދީ މުޒާހަރާ ހުއްޓުވަން މަސައްކަތް ކޮށްފައެވެ. މި ހަމަލާގައި ބައެއް މީހުންނަށް އަނިޔާވެފައިވާ ކަމަށް ވެސް ވަނީ ރިޕޯޓުކުރެވިފައެވެ.

ފުލުހުންގެ އޮފިޝަލަކު ވިދާޅުވެފައިވަނީ ހަމަނުޖެހުން އުފެއްދި މައްސަލައިގައި މަދުވެގެން 100 މީހަކު މުޒާހަރާއިން ހައްޔަރުކޮށްފައިވާ ކަމަށެވެ.

މަރުވި ޑޮކްޓަރު ރޭޕްކޮށް މަރާލާފައިވަނީ 36 ގަޑިއިރުގެ ދިގު ޑިއުޓީއެއްގައި އަރާމުކޮށްލަން ކޮންފަރެންސް ހޯލަށް ވަދެ އޮއްވައި ކަމަށް ބެލެވެއެވެ. މި މައްސަލައިގައި މިހާތަނަށް އެކަކު ވަނީ ހައްޔަރުކޮށްފައެވެ. ނަމަވެސް ތަހުގީގާ ގުޅޭ މާ ގިނަ މައުލޫމާތެއް އަދި ހާމަކޮށްފައެއް ނުވެއެވެ.

މި ހިތާމަވެރި ހާދިސާއާ ގުޅިގެން ކޮލްކަތާގެ އާންމުން ދަނީ ބޮޑު ކަންބޮޑުވުމެއް ފާޅުކުރަމުންނެވެ. އަދި މަސައްކަތުގެ މާހައުލުގައި އަންހެނުންނަށް ރައްކާތެރިކަން ކަށަވަރުކޮށްދިނުމަށާއި، މި މައްސަލައިގައި އަވަސް އިންސާފު ހޯދައިދިނުމަށް ސަރުކާރަށް ގޮވާލަމުންނެވެ.