ސަރުކާރުން 3322 ބިދޭސީން ޑީޕޯޓްކޮށްފި

ޤަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް މި ސަރުކާރުން ގެންދަނީ ވަރުގަދަ މަސައްކަތްތަކެއް ކުރަމުން / ފޮޓޯ:އިމެގްރޭޝަން

ސަރުކާރުން މިހާތަނަށް 3322 ބިދޭސީން ޑީޕޯޓްކޮށްލައިފިކަމަށް ހޯމް މިނިސްޓްރީން ހާމަކޮށްފިއެވެ.

މިނިސްޓްރީން ބުނީ މިދިޔަ އަހަރުގެ ނޮވެންބަރު 17 އިން ފެށިގެން މިމަހުގެ 25 ގެ ނިޔަލަށް މި އަދަދަށް ބިދޭސީން ފުރުވާލެވިފައިވާ ކަމަށް މޯލްޑިވްސް އިމިގްރޭޝަނުން ހާމަކޮށްފައިވާ ކަމަށެވެ.

މީގެ އިތުރުން، މިހާތަނަށް 257 ތަނަކަށް ރެއިޑްކޮށްފައިވާ ކަމަށްވެސް ހޯމް މިނިސްޓްރީން ހާމަކުރިއެވެ.

ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް ސަރުކާރުގެ އެކި މުއައްސަސާތައް ގުޅިގެން ބޮޑު އޮޕަރޭޝަނެއް ފަށާފައިވެއެވެ. މި އޮޕަރޭޝަންގެ ދަށުން މޯލްޑިވްސް އިމިގްރޭޝަނާއި މޯލްޑިވްސް ޕޮލިސް ސާވިސް ގުޅިގެން ގަވާއިދާ ޚިލާފަށް ވިޔަފާރިކުރާ ބިދޭސީން ހޯދާ ފިޔަވަޅު އެޅުމުގެ މަސައްކަތް ކުރަމުން ގެންދެއެވެ.

ސަރުކާރުން ބުނެފައިވަނީ ރާއްޖޭގައި ގަވާއިދާ ޚިލާފަށް ދިވެހިންނަށް ކުރެވެން ހުރި ވިޔަފާރިތަކުގައި ހަރަކާތްތެރިވާ ބިދޭސީންގެ މައްސަލަ ސީރިއަސް މައްސަލައެއްގެ ގޮތުގައި ބަލާ ފިޔަވަޅު އަޅަމުން ގެންދާނެ ކަމަށެވެ. އަދި ގަވާއިދާ ޚިލާފަށް އުޅޭ ބިދޭސީން ލައްވާ މަސައްކަތް ކުރުވުމަކީ ޤާނޫނީ ކުށެއް ކަމަށާއި، އެފަދަ މަސައްކަތްކުރުވާ ފަރާތްތަކާ މެދު ޤާނޫނީ ފިޔަވަޅު އަޅާނެކަމުގެ އިންޒާރު ކޮންޓްރޯލާ ޖެނެރަލް އޮފް އިމިގްރޭޝަން މުހައްމަދު ޝަމްއާން ވަހީދު ވަނީ ކުރިން ދެއްވާފައެވެ.

އިމިގްރޭޝަން އިމިގްރޭޝަން