ހޮބާ: ކޮބާ އަޖުމަ ބަލާލަމާ، ސަޅިވާނެ!

ހޮބާއޭ ބުނުމުން ފަހަރުގައި ނޭނގިދާނެއެވެ. ދިވެހި ބަހުގެ ރަދީފު ބުނާ ގޮތުން ހޮބާގެ ތިން މާނައެއް އެކުލެވެއެވެ. އެއީ، ރީތި، އަލިގަދަ އަދި ސާފެވެ.

ތަނެއް ސާފުކޮށް އޮންނަ ނަމަ އެތަނެއް ރީތިވެފަ އަލިގަދަވާނެއެވެ. ދައްކަން މިއުޅެނީ ދާދި ފަހުން ވެމްކޯއިން އަލަށް ފެށި ޚިދުމަތެއްގެ ވާހަކައެވެ.

ހޮބާގެ ނަމުން ނަން ދެވިގެން ފެށި މި ޚިދުމަތަކީ ސަރުކާރުގެ އޮފީސްތަކާއި ސަރުކާރު ހިއްސާވާ ކުންފުނިތަކުގެ އިދާރާތައް ފޮޅާ ސާފުކުރުމުގެ ގޮތުން ވެމްކޯއިން ފެށި މުޙިއްމު ޚިދުމަތެކެވެ. ވެމްކޯއާއެކު މި ޚިދުމަތް ހޯދުމުގެ ގޮތުން ސަރުކާރުގެ އެސްއޯއީއެއްގެ ގޮތުގައި ފުރަތަމަ ސޮއިކޮށްފައި މި ވަނީ އެމްޕީއެލްއެވެ.

ވެމްކޯއިން ތަޢާރަފްކުރި މި ޚިދުމަތާ ގުޅޭގޮތުން މި ނޫހަށް މަޢުލޫމާތު ދެއްވަމުން އެ ކުންފުނީގެ ސޭލްސް މެނޭޖަރ ޢަބްދުﷲ ސިނާން ވިދާޅުވީ، މި ޚިދުމަތް ތަޢާރަފް ކުރިފަހުން ގާތްގަނޑަކަށް މަހެއްހާ ދުވަސް ވެއްޖެ ކަމަށާއި، ސަރުކާރުގެ އޮފީސްތަކާއި ކުންފުނިތައް ސާފުތާހިރުކޮށް ބޭއްވުމަކީ އެތަންތަނުން ޚިދުމަތް ހޯދަން ދާ ފަރާތްތަކަށް ވަރަށް ބޮޑު ހިތްހަމަޖެހުމެއް ލިބޭނެ ކަމެއް ކަމަށް ވެމްކޯއިން އަބަދުވެސް ޤަބޫލުކުރާ ކަމަށެވެ.

އެމްޕީއެލްއާ އެކު އެއްބަސްވުމަކަށް އަޅުގަނޑުމެންނަށް މި އާދެވުނީ. މީގެ ކުރިން އެޓާރނީ ޖެނެރަލްގެ އޮފީސްވެސް ފޮޅާ ސާފުކުރުމުގެ މަސައްކަތް ފެށިގެން މިހާރުވެސް ކުރިއަށް އެބަދޭ. އަދި ކުރިއަށް އޮތް ތަނުގައި ސަރުކާރު ހިއްސާވާ އެހެން ކުންފުނިތަކާއެކުވެސް އަޅުގަނޑުމެންނަށް މި މަސައްކަތް ފެށޭނެ - ސިނާން ވިދާޅުވިއެވެ.

އެމްޕީއެލްއާއެކު ވެފައިވާ އެއްބަސްވުމުގެ ދަށުން އެ ކުންފުނީގެ 3 ރެސިޑެންޝަލް ޓަވަރުތަކުގެ ކޮރިޑޯގެ އިތުރުން ލިފްޓްވެސް ކޮންމެ ދުވަހަކު ސާފުކުރާނެއެވެ.

މި މަސައްކަތް ފެށިގެން ދިޔައިރު ފާހަގަ ކޮށްލަން ޖެހޭ މުޙިއްމު ކަމެއް އެބަ އޮތެވެ.ވެމްކޯއިން މި ޚިދުމަތް ދޭން މި ފެށީ މިހާރުވެސް ކުންފުނީގައި ތިބި މުވައްޒަފުން ބޭނުންކޮށްގެންނެވެ. އެގޮތުން ދަޢުލަތުގެ މާލިއްޔަތަށް

އެންމެ ޚަރަދު ކުޑަކޮށް ރަނގަޅު ފުރިހަމަ ޚިދުމަތެއް ދިނުމަކީ އަބަދުވެސް ވެމްކޯއިން އެންމެ އިސްކަންދޭ ކަންތަކެވެ. ކުރިއަށްވެސް ވެމްކޯއިން މިފަދަ އާ ޚިދުމަތްތައް ތަޢާރަފްކުރާނެއެވެ.