ރާއްޖެ އެތެރެކުރި 11 ކިލޯގެ މަސްތުވާތަކެތި އަތުލައިގެންފި

ވައިގެ މަގުން ރާއްޖެ އެތެރެކުރަން އުޅުނު 11.62 ކިލޯގެ މަސްތުވާތަކެތި ކަސްޓަމްސްއިން އަތުލައިގަނެފިއެވެ.

މި ތަކެތި އަތުލައިގަތީ ކޮރިއާ މެދުވެރިކޮށް ރާއްޖެއަށް ގެނެސްފައިވާ ޕާރުސަލަކާއި ވައިގެމަގުން ރާއްޖެ ގެނެސްފައިވާ ޝިޕްމަންޓެއް ބަލައިފާސްކުރުމުގެ ތެރޭގައި ޝައްކުކުރެވޭ ޒާތުގެ ބާވަތްތަކެއް ހުރުމުން، އިތުރަށް ބަލާ ފާސްކުރުމުގެ ތެރޭގައި ކަމަށް ކަސްޓަމްސްއިން މަޢުލޫމާތު ދީފައިވެއެވެ.

މި މަހުގެ 14 ވަނަ ދުވަހު ކޮރިއާ މެދުވެރިކޮށް ރާއްޖެ ގެނެސްފައިވާ ޕެކޭޖެއް ބަލާ ފާސްކުރި އިރު، އެ ޕެކޭޖުގެ ތެރެއިން މަސްތުވާތަކެތި ކަމަށް ޝައްކު ކުރެވޭ ތަކެތި ފެނުނު ކަމަށް ކަސްޓަމްސްއިން ބުނެފައިވެއެވެ. މި ތަކެތި ތަހުލީލުކުރުމުން، މަސްތުވާތަކެތީގެ ބާވަތެއް ކަމަށްވާ ސިންތެޓިކް ކެތިނޯން އަށް ޕޮޒިޓިވްވެފައިވާ ކަމަށް ވެސް އެ އިދާރާއިން ހާމަކޮށްފައިވެއެވެ. މި ތަކެތީގެ ބަރުދަނުގައި ޕެކިންއާއި އެކު ޖުމްލަ 680 ގްރާމް ހުރި ކަމަށާއި، މި ތަކެތީގެ މަގުމަތީ އަގަކީ 960,000 ރުފިޔާ ކަމަށް ކަސްޓަމްސްއިން ބުނެފައިވެއެވެ.

މީގެ އިތުރުން، 2024 އޮގަސްޓް 19 ވަނަ ދުވަހު ވައިގެމަގުން ރާއްޖެ ގެނެސްފައިވާ ޝިޕްމަންޓެއް ބަލައިފާސްކުރުމުގެ ތެރޭގައި، މަސްތުވާތަކެތި ފޮރުވާފައި ހުރިކަމަށް ޝައްކުކުރެވިގެން، އިތުރަށް ބެލިބެލުމުން މަސްތުވާތަކެތި ކަމަށް ޝައްކުކުރެވޭ ތަކެތި ފެނިފައިވާކަމަށް ކަސްޓަމްސްއިން ބުނެފައިވެއެވެ. މި ތަކެތި ތަހުލީލުކުރުމުން، މަސްތުވާތަކެތީގެ ބާވަތެއް ކަމަށްވާ ހެރޮއިން އަދި ކެނެބިސް އަށް ޕޮޒިޓިވް ވެފައިވާ ކަމަށް ކަސްޓަމްސްއިން ހާމަކޮށްފައިވެއެވެ.

ހެރޮއިން އަށް ޕޮޒިޓިވްވި ތަކެތީގެ ބަރުދަނުގައި ޕެކިންއާއި އެކު 740 ގްރާމް ހުރި ކަމަށާއި، ކެނެބިސް އަށް ޕޮޒިޓިވްވި ތަކެތީގެ ބަރުދަނުގައި ޕެކިންއާއި އެކު 10.2 ކިލޯ ހުރި ކަމަށް ކަސްޓަމްސްއިން ހާމަކޮށްފައިވެއެވެ. މި ތަކެތީގެ މަގުމަތީ އަގަކީ 8.9 މިލިއަން ރުފިޔާ ކަމަށް ވެސް އެ އިދާރާއިން ބުނެފައިވެއެވެ.

ކަސްޓަމްސްއިން މަޢުލޫމާތު ދީފައިވާ ގޮތުގައި، އަތުލައިގަނެފައިވާ މަސްތުވާތަކެތީގެ ޖުމްލަ ބަރުދަނަކީ 11.62 ކިލޯއެވެ. މި ދެ މައްސަލަ އިތުރަށް ތަހުގީގު ކުރުމަށްޓަކައި، އަތުލައިގަނެވުނު މަސްތުވާތަކެތި މިހާރު ވަނީ ފުލުހުންނާ ހަވާލުކޮށްފައެވެ.

މި ދެ މައްސަލައިގައި އަތުލެވުނު މަސްތުވާތަކެތީގެ ޖުމްލަ އަގު 9.86 މިލިއަން ރުފިޔާއަށް އަރާ ކަމަށް ލަފާކުރެވެއެވެ. މި މައްސަލަތަކާ ގުޅިގެން އިތުރު ތަފްސީލު ހާމަކުރެވޭނީ ތަހުގީގު ނިމުމުން ކަމަށް ކަސްޓަމްސްއިން ބުނެފައިވެއެވެ.