ލަންދޫގައި ޒަމާނީ ފެންވަރުގެ ވޮލީ ކޯޓެއް މިރޭ ހުޅުވަނީ

ލަންދޫގެ ތާރީޚުގައި ފުރަތަމަ ފަހަރަށް ސަރުކާރުން އަޅައިދެއްވި ޓާފު އެޅި ޒަމާނީ ފެންވަރުގެ ވޮލީ ކޯޓު މިރޭ 20:30 ގައި ރަސްމީކޮށް ހުޅުވައިދެއްވުމަށް ހަމަޖެހިފައިވެއެވެ. މި ރަސްމިއްޔާތު ޝަރަފުވެރިކޮށްދެއްވާނީ ލަންދޫ ކައުންސިލްގެ ރައީސް އަބްދުލް އަޒީޒު މުހައްމަދު އެވެ.

ލަންދޫ ކައުންސިލްގެ ނައިބު ރައީސް މަންސޫރު މުޙައްމަދު ވިދާޅުވި ގޮތުގައި، ލަންދޫގައި އެއްވެސް ބާވަތެއްގެ ކުޅިވަރެއް ކުޅޭނެ ފުރުޞަތު ނުލިބި ދެ އަހަރު ވެފައިވެއެވެ. މި ވޮލީ ކޯޓަކީ ކުރީގެ ސަރުކާރުން ފެށި ޕްރޮޖެކްޓެއް ނަމަވެސް، އޭރު ފެށި އެއްވެސް ޒުވާނުންނާ ގުޅުންހުރި މަޝްރޫޢެއް ނިންމާލެވިފައެއް ނުވެއެވެ. އެހެންނަމަވެސް، މިހާރުގެ ސަރުކާރުން ވަނީ ޒުވާނުންގެ ތަރައްޤީއަށް ޚާއްޞަ އަހަންމިއްޔަތުކަމެއް ދެއްވާފައެވެ. މިގޮތުން، ކުރިން ހުއްޓިފައި ހުރި ގިނަ މަޝްރޫޢުތަކެއް މިހާރު ދަނީ ކާމިޔާބުކަމާއެކު ނިންމަމުންނެވެ. މީގެ އިތުރުން، ޒުވާނުންނަށް ބޭނުންވާ ވަސީލަތްތައް ޤާއިމުކުރުމަށް ޚާއްޞަ ސަމާލުކަމެއް ދެއްވައި، އެކަންކަން ހަލުވި ދުވެއްޔެއްގައި ކުރިއަށް ގެންދަވަމުން ގެންދަވައެވެ. މި ސަރުކާރުގެ މި މަސައްކަތްތަކަކީ ޤައުމުގެ މުސްތަޤުބަލަށް ކުރެވޭ އަގުހުރި އިންވެސްޓްމަންޓެއް ކަމުގައި ދެކެމެވެ. މި ވޮލީ ކޯޓުގެ މަސައްކަތްވެސް ހުއްޓިފައި އޮތް ހިސާބުން، މިހާރުގެ ސަރުކާރުން ކޮންޓްރެކްޓަރަށް ފައިސާ ދައްކައި މަޝްރޫޢު ނިންމާލެވިފައިވާ ކަމަށް އެމަނިކުފާނު ވިދާޅުވިއެވެ.

މި ވޮލީ ކޯޓު ހުޅުވިގެންދަނީ ހަރުދަނާ އުސޫލުތަކެއްގެ ދަށުން، އަންހެނުންނާއި ފިރިހެނުންނަށް ހަމަހަމަ ފުރުޞަތު ލިބޭގޮތަށް ގަޑިތައް ބަހާލައިގެންނެވެ. ހުޅުވުމުގެ ރަސްމިއްޔާތުގައި ވާދަވެރި ދެ މެޗެއް ކުޅެވޭނެއެވެ. ފުރަތަމަ މެޗުގައި ބައްދަލުކުރާނީ މުއައްސަސާތަކުގެ ޓީމަކާއި ޒުވާނުންގެ ތެރެއިން ހޮވާލެވިފައިވާ ޓީމެކެވެ. ދެވަނަ މެޗުގައި ބައްދަލުކުރާނީ މުއައްސަސާތަކުގެ އަންހެނުންގެ ޓީމަކާއި ޒުވާނުންގެ ތެރެއިން ހޮވާލެވިފައިވާ އަންހެނުންގެ ޓީމެކެވެ.