ސާފުތާހިރު ނޫންގޮތަށް ކާބޯތަކެތި ހަދާ ތަނަކުން 15 ބިދޭސީން ހިފަހައްޓައިފި

މާލޭގައި ނުސާފުތާހިރުކޮށް ކާބޯތަކެތި ހަދާ އިތުރު ތަނެއް ހޯދައި 15 ބިދޭސީއަކު މިއަދު ހިފަހައްޓައިފި އެވެ.

އިމިގްރޭޝަނުން އެކްސްގައި ކުރި ޕޯސްޓެއްގައި ބުނެފައިވާ ގޮތުގައި، ގަވާއިދާ ޚިލާފަށް ބިދޭސީންތަކެއް ރާއްޖޭގައި ކުރަމުންދާ ވިޔަފާރިއަކާ ގުޅޭ މަޢުލޫމާތު ޓާސްކް ފޯސްއަށް ލިބުމާ ގުޅިގެން ހ. ބިއަންކާގެ ބަލައި ފާސްކޮށްފައިވެ އެވެ. އަދި އެ ގޭގައި ގަވާއިދާ ޚިލާފަށް އުޅެމުންދިޔަ 15 ބިދޭސީއަކު އިމިގްރޭޝަންގެ ބެލުމުގެ ދަށަށް ގެނެސްފައިވާ ކަމަށް ވެސް އެ އިދާރާއިން ބުނެފައިވެ އެވެ.

"މި ރެއިޑުގައި ވެސް ކަމާ ގުޅުން ހުރި އިދާރާތަކުން ވަނީ ބައިވެރިވެފައި. އަދި މިތަނުގައި ކުރަމުން ދިޔަ ވިޔަފާރި ހުއްޓުވުމަށް ވަނީ ނޯޓިސް ދީފައި،" އިމިގްރޭޝަނުން ބުންޏެވެ.

އިމިގްރޭޝަނުން އާންމުކޮށްފައިވާ ފޮޓޯތަކުން ފެންނަ ގޮތުގައި، އެ ގެ އޮތީ ވަރަށް ނުތާހިރުކޮށެވެ. މޭޒެއްގެ މަތީގައި ރިހަ އަޅާފައި ހުރި ތެއްޔަކާއި ޓައްޕަކާއި ތަބަކެއް ހުއްޓެވެ. އަދި ޕްލާސްޓިކު ކޮތަޅުތަކަކަށް ބަތް އަޅާފައި ހުއްޓެވެ. ބޮޑެތި ކެއުންތައް ތައްޔާރުކުރަން ބޭނުންކުރާ އުނދުނާއި ތެލި ވެސް އެ ގޭގެ ތެރޭގައި ހުއްޓެވެ.

ބެލެވޭ ގޮތުގައި، އެއީ ބިދޭސީންނަށް ކެއުން ތައްޔާރުކުރާ ތަނެކެވެ. ގަވާއިދާ ޚިލާފަށް ރާއްޖޭގައި އުޅޭ ބިދޭސީން ހިފެހެއްޓުމަށް އިމިގްރޭޝަނުން ހިންގާ އޮޕަރޭޝަންގައި މީގެ ކުރިން ވެސް ވަނީ ނުސާފުތާހިރުކޮށް ކާބޯތަކެތި ތައްޔާރުކުރާ އެތައް ތަނެއް ހޯދައިފަ އެވެ. އެ ތަންތަނުގައި އުޅޭ ބިދޭސީން ހިފަހައްޓައި ޑީޕޯޓްކުރުމުގެ މަސައްކަތް އިމިގްރޭޝަނުން އަންނަނީ ކުރަމުންނެވެ.