ކުޑަކުއްޖަކަށް އަނިޔާކުރި މައްސަލައިގައި އަންހެނަކު ހޯދަން ފުލުހުން އިއުލާންކޮށްފި

ކުޑަކުއްޖެއް ގައިގައި ޖެހި މައްސަލާގައި ހޯދަމުންދާ އަންހެން މީހާ: ފޮޓޯ/ ޕޮލިސް

ގދ. ގައްދޫގައި ކުޑަކުއްޖެއްގެ ގައިގާ ޖަހައި މާރާމާރީ ހިންގި މައްސަލައެއްގައި އަންހެނަކު ހޯދަން ފުލުހުން އިއުލާންކޮށްފި އެވެ.

ފުލުހުން ބުނާ ގޮތުގައި ގދ. ގައްދޫ ޕޮލިސް ސްޓޭޝަނުން ތަހުގީގު ކުރަމުންދާ މި މައްސަލައިގައި ތަހުގީގަށް ހޯދަން އިއުލާންކޮށްފައިވަނީ ޝަފުރާ އަބްދުﷲ އާދަމް (ދިލާވަރުގެ، ގދ. ގައްދޫ) އެވެ.

ފުލުހުން މައުލޫމާތު ދިން ގޮތުގައި ޝަފުރާ އުޅޭ ވަކި ތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓު ރައްދު ކުރެވިފައި ނުވާތީ، ޖިނާއީ މައްސަލަތައް ތަހުގީގުކުރުމުގައި ފުލުހުން އަމަލުކުރާނެ އިޖުރާއަތުގެ ގަވާއިދުގެ 27 ވަނަ މާއްދާގައިވާ ގޮތުގެ މަތިން އޭނާ ތަހުގީގަށް ހާޒިރު ކުރަނީއެވެ.

ފުލުހުން އެދިފައިވަނީ މި މަހުގެ 2 ވަނަ ދުވަހުގެ ހެނދުނު 10:00 އަށް ކްރިމިނަލް އިންވެސްޓިގޭޝަން ބިލްޑިންގ ނުވަތަ ގދ. ޕޮލިސް ސްޓޭޝަނަށް ޝަފުރާ ހާޒިރުވުމަށެވެ.

ނަމަވެސް ޝަފުރާ ހޯދަން އިއުލާންކުރީ ސީދާ ކޮން ކުއްޖަކަށް އަނިޔާކުރި މައްސަލައަކާ ގުޅިގެން ކަމެއް މިހާތަނަށް އެނގިފައެއް ނުވެ އެވެ.

ފާހަގަކޮށްލެވޭ ގޮތުގައި ސޯޝަލް މީޑިއާގައި ދޭތެރެ ދޭތެރެއިން ކުޑަކުދިންނަށް އަނިޔާ ކުރުމުގެ މައްސަލަ ފެންމަތިވެ އެވެ. އަދި އެފަދަ މައްސަލަތައް ފުލުހުން ތަހުގީގު ވެސް ކުރެ އެވެ.

ފުލުހުން ފުލުހުން