ހިޒްބުﷲ އިން އިސްރާއީލަށް މިސައިލް ހަމަލާ ދޭން ފަށައިފި

ބެއިރޫތުގައި ފާއިތުވި މަހު ހިޒްބުﷲ ގެ އިސް ކޮމާންޑަރެއް އަވަހާރަކޮށްލުމުގެ ބަދަލު ހިފުމަށް، އީރާނުގެ އެހީތެރިކަން ލިބިފައިވާ އެ ޖަމާޢަތުން އިސްރާއީލަށް ވަރުގަދަ މިސައިލް ހަމަލާތަކެއް ދޭން ފަށައިފިއެވެ.

މި ހަމަލާތައް ދީފައި ވަނީ ޣައްޒާގައި ހިނގަމުންދާ ހަނގުރާމަ ހުއްޓުވުމަށާއި، ހަމާސްގެ ބާރުގެ ދަށުގައިވާ އިސްރާއީލުގެ ރަހީނުން ދޫކޮށްލުމުގެ ބަދަލުގައި ފަލަސްތީނުގެ ގައިދީން ދޫކޮށްލުމުގެ މަޝްވަރާކުރުމަށް ކައިރޯގައި ބައްދަލުވުމެއް ކުރިއަށްދަނިކޮށެވެ.

ހިޒްބުﷲ އިން ހަމަލާ ދޭން ތައްޔާރުވަމުންދާކަން ފާހަގަކުރެވުމާއެކު، އިސްރާއީލުގެ ހަނގުރާމަވެރި މަތިންދާބޯޓުތަކުން ލެބަނަންގައި ހުރި އަމާޒުތަކަށް ހަމަލާދިނެވެ. އިސްރާއީލުގެ ޑިފެންސް ފޯސަސްއިން ބުނެފައިވަނީ ހިޒްބުﷲ އިން އިސްރާއީލުގެ ސަރަހައްދަށް މިސައިލްތަކާއި ރޮކެޓު ހަމަލާތައް ދޭން ތައްޔާރުވަމުންދާތީ، އެކަމަށް ރައްދު ދިނުމުގެ ގޮތުން ލުބުނާންގައި ހުރި އެޖަމާޢަތުގެ އަމާޒުތަކަށް ހަމަލާދެމުންދާ ކަމަށެވެ.

މި ހަމަލާތަކާ ގުޅިގެން ޓެލް އަވީވުގައި އޮންނަ ބެން ގުރިއަން އެއަރޕޯޓުގެ ދަތުރުތައް ވަނީ ހުއްޓާލާފައެވެ. އަދި އިސްރާއީލުގެ ޑިފެންސް މިނިސްޓަރު ވަނީ ކުއްލި ނުރައްކަލުގެ ހާލަތު އިޢުލާނުކޮށްފައެވެ.

މި ހަމަލާތަކަށް ފަހު، ދެ ފަރާތުގެ ދެމެދުގައި ކަންކަން އިތުރަށް ގޯސްވެދާނެކަމުގެ ބިރު އުފެދިފައިވެއެވެ. ފާއިތުވި މަހު އިސްރާއީލުން ހިފާފައިވާ ގޮލާން ހައިޓްސްއަށް ދިން މިސައިލް ހަމަލާއެއްގައި 12 ޒުވާނުން މަރުވުމާއި، އޭގެ ރައްދުގައި އިސްރާއީލުން ހިޒްބުﷲ ގެ އިސް ކޮމާންޑަރެއް ބެއިރޫތުގައި އަވަހާރަކޮށްލުމާ ގުޅިގެން ދެ ފަރާތުގެ ދެމެދުގައި ހަނގުރާމަ ފެށިދާނެކަމުގެ ބިރު އިތުރުވެފައިވެއެވެ.