އެލިސަން ސައުދީ ލީގަށް ނޯ ޖަހައިފި

ލިވަޕޫލްގެ ބްރެޒިލް ގޯލްކީޕަރު އެލިސަން ބެކާ

ލިވަޕޫލްގެ ބްރެޒިލް ގޯލްކީޕަރު އެލިސަން ބެކާ ވަނީ މި މޫސުމުގައި ސައުދީ އަރަބިއްޔާގެ ކްލަބެއްގެ ހުށަހެޅުމަކަށް އިންކާރުކޮށްފައެވެ.

ސައުދީގެ ހުށަހެޅުމާ ގުޅޭގޮތުން ފުރަތަމަ ފަހަރަށް ޚިޔާލު ފާޅުކުރަމުން، ބެކާ ވިދާޅުވީ ލިވަޕޫލްގައި އޭނާއާއި އާއިލާ ދަނީ އުފާވެރި ދުވަސްތަކެއް ހޭދަކުރަމުންނެވެ. އަދި 2026 ގެ ނިޔަލަށް ލިވަޕޫލްއާއެކު ވެފައިވާ އެއްބަސްވުމަށް އިޙްތިރާމްކުރުމަށް ނުވަތަ އެ އެއްބަސްވުމުގެ މުއްދަތު އިތުރުކުރުމަށް އެދޭކަމަށެވެ.

އިތުރަށް ބެކާ ފާހަގަކުރެއްވީ، ސައުދީގެ ހުށަހެޅުންތަކުގެ މާލީ އަގުތައް ފެނުމުން ބައެއް ކުޅުންތެރިން ޝައުޤުވެރިވުމަކީ އާދައިގެ ކަމެއްކަމަށެވެ. ނަމަވެސް މިއީ ސައުދީއަށް ބަދަލުވުމަށް އެކަށީގެންވާ ވަގުތެއް ނޫންކަމަށްވެސް އޭނާ ވިދާޅުވިއެވެ.

ބެކާއާއެކު ލިވަޕޫލްގައި ކުޅެމުންދިޔަ ފަބީނިއޯ، ރޮބާޓޯ ފަރމީނިއޯ އަދި ޖޯޑަން ހެންޑަސަން ވަނީ މިހާރު ސައުދީގެ ކްލަބްތަކަށް ބަދަލުވެފައެވެ.

ސައުދީގެ ކްލަބަކުން ބެކާއަށް ހުށަހެޅުމެއް ލިބިފައިވާއިރު، ލިވަޕޫލްއިން ދަނީ ވެލެންސިއާގެ 23 އަހަރުގެ ޖޯޖިއާ ގޯލްކީޕަރު ގިއޯގި މަމަރްދަޝްވިލީ ހޯދުމަށް މަސައްކަތްކުރަމުންނެވެ. މީޑިއާ ރިޕޯޓުތަކުގައި ބުނެފައިވާ ގޮތުން، ލިވަޕޫލްއިން ވަނީ މަމަރްދަޝްވިލީއަށް 30 މިލިއަން ޕައުންޑުގެ ހުށަހެޅުމެއް ހުށަހަޅާފައެވެ.

2018 ވަނަ އަހަރު އިޓަލީގެ ރޯމާއިން 66.8 މިލިއަން ޕައުންޑަށް ލިވަޕޫލްއާ ގުޅުނު ބެކާ ވެފައިވަނީ އޭރު ދުނިޔޭގެ އެންމެ އަގުބޮޑު ޓްރާންސްފަރ ހެދި ގޯލްކީޕަރަށެވެ.