ޕީއެސްއެމްގެ އެމްޑީގެ މަޤާމަށް މުޙައްމަދު ސަޢީދު އައްޔަންކޮށްފި

ދައުލަތުގެ މީޑިއާ، ޕަބްލިކް ސަރވިސް މީޑިއާ (ޕީއެސްއެމް) ގެ މެނޭޖިންގ ޑިރެކްޓަރުގެ މަޤާމަށް، ކުރިން ތަޢުލީމީ ދާއިރާގައި ގިނަ ދުވަސްތަކެއް ވާންދެން މަސައްކަތް ކުރެއްވި މުޙައްމަދު ސަޢީދު އިއްޔެ އައްޔަންކޮށްފިއެވެ.

ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ސަޢީދު އެ މަޤާމަށް އައްޔަން ކުރެއްވީ، ކުރިން އެ މަޤާމުގައި ހުންނެވި ޒީނާ ޒާހިރު އިއްޔެ އިސްތިޢުފާ ދެއްވުމާ ގުޅިގެންނެވެ. ޕީސީބީއިން ބުނި ގޮތުގައި، ސަޢީދު އައްޔަންކޮށްފައި ވަނީ ޕީއެސްއެމްގެ އެމްޑީގެ އިތުރުން ޑިރެކްޓަރުންގެ ބޯޑުގެ މެންބަރު ކަމަށްވެސް މެއެވެ.

މީގެ 35 އަހަރު ކުރިން ފެށިގެން ދައުލަތަށް ޚިދުމަތް ކުރައްވަމުން ގެންދަވާ ސަޢީދު އެންމެ ގިނަ ދުވަހު މަސައްކަތް ކުރެއްވީ އެޑިޔުކޭޝަން މިނިސްޓްރީގައެވެ. އެގޮތުން އެ މިނިސްޓްރީގެ ޕަރމަނަންޓް ސެކްރެޓަރީގެ މަޤާމާއި ޑިރެކްޓަރ ޖެނެރަލްގެ މަޤާމު ފުރުއްވިއެވެ.

އެޑިޔުކޭޝަނުން ސަޢީދު ވަކިކުރީ، 2018 ވަނަ އަހަރު ބޭއްވި ރިޔާސީ އިންތިޚާބާ ދިމާކޮށް ސިވިލް ސަރވިސް މުވައްޒަފުންނާ ދޭތެރޭ ޤާނޫނާއި ގަވާއިދާ ޚިލާފަށް ޢަމަލުކުރި ކަމަށް ބުނެ ހުށަހެޅި މައްސަލަތަކެއްގައި 2019 ވަނަ އަހަރުއެވެ. ވަކިކުރުމުގެ ކުރިން ގިނަ ދުވަސްތަކެއް ވާންދެން ސަސްޕެންޝަނުގައި ވެސް ހުންނެވިއެވެ.

އިނގިރޭސިވިލާތުން މަތީ ތަޢުލީމު ޙާޞިލް ކުރައްވާފައިވާ ސަޢީދު، މީޑިއާގެ ދާއިރާއިން ވެސް ކިޔަވާ ވިދާޅުވެފައިވާކަން ފާހަގަކުރެވެއެވެ.