ދީނީ އިލްމުވެރިންގެ އަހަރީ ބައްދަލުވުން ފެށިއްޖެ

އިސްލާމިކް މިނިސްޓްރީން އިންތިޒާމުކޮށްގެން ބާއްވާ ދިވެހިރާއްޖޭގެ ދީނީ އިލްމުވެރިންގެ އަހަރީ ބައްދަލުވުން ރޭ ފަށައިފިއެވެ.

 މި ބައްދަލުވުން ފަށާފައި ވަނީ މިކަމަށްޓަކައި އިސްލާމީ މަރުކަޒުގެ ޖަލްސާކުރާ މާލަމުގައި ބޭއްވި ޚާއްޞަ ރަސްމިއްޔާތެއް ގައެވެ.

މި ރަސްމިއްޔާތު ޝަރަފުވެރިކޮށްދެއްވީ ޖަމިއްޔަތު ތުފޫދުލް ޙަރަމްގެ ރައީސް އަލްއުސްތާޛު ދުކްތޫރު ޙަމްދާން ބިން ޙުމައިދު ބިން ބުރައިކް އައްސުލަމީއެވެ.

ރަސްމިއްޔާތުގައި ވާހަކަފުޅު ދައްކަވަމުން އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ، އިސްލާމީ ކަންތައްތަކާ ބެހޭ ވުޒާރާއިން ކުރައްވަމުން ގެންދަވާ މަސައްކަތްތަކާއި ޙާޞިލްކުރެވޭ ކާމިޔާބީތަކުގެ ފަހަތުގައި ހުންނެވި އެންމެ ބޮޑު ހިއްސާދާރަކީ ރައީސް ޑރ. މުޙައްމަދު މުޢިއްޒު ކަމަށެވެ. އަދި މިއަދުގެ ސަރުކާރަކީ އިސްލާމްދީނަށް ނަޞްރު ދިނުމުގައި ދެމިތިބޭނެ ސަރުކާރެއްކަމަށްވެސް ވަޒީރު ފާހަގަކުރެއްވިއެވެ.

އިސްލާމީ ކަންތައްތަކާބެހޭ ވުޒާރާއިން މިހާރު ކުރިއަށް ގެންދާ ގިނަ ކަންކަމުގައި އެންމެ މުހިންމު ބަޔަކީ ދީނީ އިލްމުވެރިން ކަމަށް ވިދާޅުވެ، އެ ބޭފުޅުންގެ އެއްބާރުލެއްވުމަށް ޝުކުރު އަދާކުރެއްވިއެވެ.

ވަޒީރު އިތުރަށް ފާހަގަކުރެއްވި ގޮތުގައި، އަހަރުތަކެއްގެ މެދުކެނޑުމަކަށްފަހު، ދީނީ އިލްމުވެރިންގެ އަހަރީ ބައްދަލުވުން އަލުން ބޭއްވޭތީ އުފާވެވަޑައިގަންނަވާކަމަށެވެ.

މި ބައްދަލުވުމުގައި ރާއްޖޭގެ ގިނަ ދީނީ އިލްމުވެރިން ބައިވެރިވާއިރު، ބައްދަލުވުމުގެ އެކި ދަންފަޅިތަކުގައި ދީނީ އެކި މުހިންމު މައުޟޫތަކަށް ބަހުސްކުރުމާއި ތަފާތު މައުޟޫއުތަކަށް އިލްމުވެރިންނަށް މަޢުލޫމާތު ދިނުމުގެ ސެޝަންތައް ބޭއްވުމަށް ހަމަޖެހިފައިވާކަމަށް މިނިސްޓްރީން މަޢުލޫމާތު ދެއެވެ. މި ބައްދަލުވުން ކުރިއަށް ގެންދިއުމަށް ހަމަޖެހިފައިވަނީ މި ރޭގެ ނިޔަލަށެވެ.

މި ބައްދަލުވުމަކީ ދީނީ އިލްމުވެރިންނާއި ސަރުކާރާ ދެމެދު ގުޅުން ބަދަހިކޮށް، ދީނީ ކަންކަމުގައި މަޝްވަރާކުރުމަށް ލިބޭ މުހިންމު ފުރުޞަތެއް ކަމަށް ބެލެވެއެވެ.