ރައީސުލްޖުމުހޫރިއްޔާ "މޯލްޑިވްސް ފުޑް އެންޑް ޑްރަގް އޮތޯރިޓީ" އުފައްދަވައިފި

ކާބޯތަކެތީގެ ރައްކާތެރިކަމުގެ ޤާނޫނުގެ އަށް ވަނަ މާއްދާގެ (ހ)ގެ ދަށުން "މޯލްޑިވްސް ފުޑް އެންޑް ޑްރަގް އޮތޯރިޓީ" ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މިއަދު ގާއިމުކުރައްވައިފިއެވެ.

މި އޮތޯރިޓީއަކީ މިނިސްޓްރީ އޮފް ހެލްތުގެ ދަށުން ހިންގަމުންދާ ތަނެއްގެ ގޮތުގައި ވެސް ރައީސް ވަނީ ހަމަޖައްސަވާފައެވެ.

މިކަން އިއުލާނުކުރައްވާފައި ވަނީ ރައީސް އޮފީހުން މިއަދު ނެރުއްވި އިއުލާނަކުންނެވެ.

މި އޮތޯރިޓީ ގާއިމުކުރެއްވުމާ ގުޅިގެން، މިހާތަނަށް މިނިސްޓްރީ އޮފް ހެލްތުގެ ދަށުން ހިނގަމުން އައި، މޯލްޑިވްސް ފުޑް އެންޑް ޑްރަގް އޮތޯރިޓީ މިއަދުން ފެށިގެން އުވާލާފައިވާ ކަމަށް ބަޔާނުގައި ބުނެފައިވެއެވެ.

ނަމަވެސް ދައުލަތުގެ އިދާރާތަކުން މޯލްޑިވްސް ފުޑް އެންޑް ޑްރަގް އޮތޯރިޓީއަށް ލިޔުއްވާ ސިޓީގައި ޖައްސަވަން ވާނީ، ކުރިން މިނިސްޓްރީ އޮފް ހެލްތުގެ ދަށުން ހިނގަމުންއައި އޮތޯރިޓީއަށް ހަމަޖައްސަވައިފައިވާ ނަންބަރު 182 ކަމަށް ރައީސް އޮފީހުން ބުނެފައިވެއެވެ.

މޯލްޑިވްސް ފުޑް އެންޑް ޑްރަގް އޮތޯރިޓީގެ ނަމުގައި ވަކި އޮފީހެއް 15 ފެބްރުއަރީ 2006 ގައި އުފައްދަވައި، އެ އޮފީހަކީ މިނިސްޓްރީ އޮފް ހެލްތުގެ ދަށުން ހިންގަމުންދާ ތަނެއް ކަމުގައި އޭރުގެ ރައީސުލްޖުމްހޫރިއްޔާ މައުމޫނު އަބްދުލްގައްޔޫމު ހަމަޖައްސަވާފައިވެއެވެ.

މި އޮފީސް އުފެއްދެވުމުގެ ބޭނުމަކީ، ކާބޯތަކެއްޗާ ބެހޭ މިންގަނޑުތައް ކަނޑައަޅައި، އެކަން ވިލަރެސްކުރުމުގެ މަސައްކަތްތައް އެއް އިދާރާއަކުން ކުރާގޮތަށް ހަމަޖެއްސުމެވެ.