ޤައުމީ ޔުނިވަރސިޓީގެ ކޯސްތަކުގެ މަޢުލޫމާތު ސީދާ ޔުނިވަރސިޓީން ސާފުކުރުމަށް އިލްތިމާސްކޮށްފި

ޤައުމީ ޔުނިވަރސިޓީ (އެމްއެންޔޫ) އިން ކުރިއަށް ގެންދާ ކޯސްތަކުގެ މަޢުލޫމާތު ސީދާ ޔުނިވަރސިޓީން ސާފުކުރުމަށް އިލްތިމާސްކޮށްފި އެވެ.

އެމްއެންޔޫ އިން މިގޮތަށް އެދިފައި ވަނީ އެ ޔުނިވަސިޓިން ކުރިއަށް ގެންދާ ކޯސްތަކެއް ކަމަށް ބުނެ ސައްޙަ ނޫން މަޢުލޫމާތު ސޯޝަލް މީޑިއާގައި ދައުރުވާން ފެށުމާ ގުޅިގެންނެވެ.

އެމްއެންޔޫ އިން ބުނީ ސްކޭމަރުންގެ އާ އުކުޅެއްގެ ގޮތުގައި ޔުނިވަރސިޓީގެ ނަން ބޭނުންކޮށްގެން ސައްޙަ ނޫން ކޯސްތަކުގެ މަޢުލޫމާތު ދައުރުކުރަމުންދާ ކަމަށެވެ. އެހެންކަމުން، މަތީ ތަޢުލީމު ހާސިލުކުރުމަށް އެމްއެންޔޫ އިޚްތިޔާރުކުރާ ދަރިވަރުންނަށް މިކަމަށް ސަމާލުވުމަށް އިލްތިމާސްކޮށްފައިވެ އެވެ.

"ހަމައެކަނި އެމްއެންޔޫގެ ވެބްސައިޓު މެދުވެރިކޮށް ފެންނަން ހުންނަ ކޯސްތަކަކީ ޔުނިވަރސިޓީ އިން ކުރިއަށް ގެންދާ ކޯސްތައް،" އެމްއެންޔޫ އިން ބުންޏެވެ. އަދި އެއްވެސް ކޯހެއްގައި ބައިވެރިވުމުގެ ކުރިން ޔުނިވަރސިޓީގެ ވެބްސައިޓު މެދުވެރިކޮށް ކޯހުގެ ސައްޙަކަން ކަށަވަރުކޮށް، ސީދާ އެމްއެންޔޫގެ ވެބްސައިޓު މެދުވެރިކޮށް ކޯހުގައި ބައިވެރިވުމަށް އިލްތިމާސްކުރި އެވެ.

އެމްއެންޔޫ އިން ކުރިއަށް ގެންދާ ކޯސްތަކަށް އެ ޔުނިވަރސިޓީގެ ވެބްސައިޓުގައި ޚާއްޞަކޮށްފައިވާ ޕޯޓަލް މެދުވެރިކޮށް ކުރިމަތިލެވޭނެ އެވެ. އެމްއެންޔޫ އިން ސެޓްފިކެޓް ލެވެލްގެ ކޯސްތަކުން ފެށިގެން މާސްޓާސް ޑިގްރީ ލެވެލްގެ ކޯސްތައް ހިންގައެވެ.

މީގެ ތެރޭގައި ޓޫރިޒަމް، ހޮސްޕިޓާލިޓީ، ކަލިނަރީ އާޓްސް، ޖާނަލިޒަމް، ޕޮލިޓިކަލް ސައިންސް، ބިޒްނަސް، އެކައުންޓިންގ، އިކޮނޮމިކްސް، ޓީޗިންގ، ނާސިންގ، ސައިކޮލޮޖީ، ހެލްތު ސައިންސަސް، އާކިޓެކްޗަރ، އިންޓީރިއަރ ޑިޒައިން، އިންފޮމޭޝަން ޓެކްނޮލޮޖީ، ސިވިލް އިންޖިނިއަރިންގ، ސައިންސް، އެންވަޔަރަންމަންޓަލް މެނޭޖްމަންޓް، މެރިން ސައިންސް، މެރިޓައިމް ސްޓަޑީސް، ޝަރީޢާ އެންޑް ލޯ އަދި މެޑިސިން ފަދަ ދާއިރާތަކުން މަތީ ތަޢުލީމު ހާސިލުކުރެވެން ހުރެއެވެ.

މި ހުރިހާ ކޯހަކާ ބެހޭ މަޢުލޫމާތު ވެސް ޔުނިވަރސިޓީގެ ރަސްމީ ވެބްސައިޓުން ލިބެން ހުންނާނެ ކަމަށް އެމްއެންޔޫ އިން ބުނެފައިވެއެވެ.