ތައިލެންޑުގެ އެއާޕޯޓުން ފުރި ބޯޓެއް ވެއްޓި 9 މީހުން މަރުވެއްޖެ

ތައިލެންޑުގެ ބެންކޮކް އިންޓަނޭޝަނަލް އެއާޕޯޓުން ފުރި ބޯޓެއް ވެއްޓި، އެ ބޯޓުގައި ތިބި 9 މީހުން މަރުވެއްޖެއެވެ.

މި ހާދިސާ ހިނގީ އިއްޔެ މެންދުރުފަހު ބޯޓު ފުރިތާ މާގިނައިރުތަކެއް ނުވަނީސްކަމަށް ތައިލެންޑުގެ ސިވިލް އޭވިއޭޝަން އޮތޯރިޓީން މަޢުލޫމާތު ދީފައިވެއެވެ.

ތައިލެންޑުގެ މީޑިއާތަކުން ރިޕޯޓުކޮށްފައިވާ ގޮތުގައި، ބޯޓު ވެއްޓިފައިވަނީ ބެންކޮކް އެއާޕޯޓާ ގާތްގަނޑަކަށް 40 ކިލޯމީޓަރު (25 މޭލު) ދުރުގައި އޮންނަ ޗަޗޮއެންގްސާއޯ ޕްރޮވިންސްގެ މެންގްރޯވް ޗަސްބިމަކަށެވެ.

ސިވިލް އޭވިއޭޝަން އޮތޯރިޓީގެ ތަރުޖަމާނު ވިދާޅުވި ގޮތުގައި، ބޯޓުގައި ތިބި މީހުންގެ ތެރޭގައި ހޮންކޮންގެ ފަތުރުވެރިންނާއި، ތައިލެންޑުގެ ދެ އަންހެން ކްރޫއިންނާއި، ޕައިލެޓާއި ކޯ ޕައިލެޓް ހިމެނެއެވެ. ނަމަވެސް އެ މީހުންނަކީ ކޮން ބައެއްކަން އަދި ސާފުވެފައެއް ނުވެއެވެ.

ކަމާބެހޭ އިދާރާތަކުން ބުނެފައިވާ ގޮތުގައި، މިހާތަނަށް ހޯދިފައިވާ މަޢުލޫމާތުތަކުން ބޯޓު ވެއްޓުނު ސަބަބެއް އަދި ސާފުވެފައެއް ނުވެއެވެ.

ސިވިލް އޭވިއޭޝަން އޮތޯރިޓީން މަޢުލޫމާތު ދީފައިވާ ގޮތުގައި، މި ބޯޓަކީ ތައިލެންޑުގެ ފްލައިން ސާވިސް ކޮމްޕެނީން ހިންގާ ސެސްނާ ކެރަވަން ސީ208ބީ ނަމަކަށް ކިޔާ ޓާބޯޕްރޮޕް ބޯޓެކެވެ. މި ބޯޓު ބެންކޮކްގެ ސުވާނަބޫމީ އެއާޕޯޓުން ފުރީ މެންދުރު 2:46 ގައެވެ. އޭގެ 11 މިނެޓް ފަހުން، އެއާޕޯޓުގެ އިރުދެކުނުން 35 ކިލޯމީޓަރު (22 މޭލު) ދުރުގައި އެއާ ޓްރެފިކް ކޮންޓްރޯލުން ރޭޑިއޯ އާއި ރާޑަރާއި ބޯޓުގެ ގުޅުން ކެނޑުނު ކަމަށް ލަފާކުރެވެއެވެ.