ޕީޖީ ވަކިކުރުމުގެ މައްސަލަ މަޖިލިހަށް ހުށަހެޅިފައި ވަނިކޮށް އޭނާ މަޤާމުން އިސްތިއުފާ ދެއްވައިފި

ރައްޔިތުންގެ މަޖިލީހުން ޕްރޮސިކިއުޓަރ ޖެނެރަލްގެ މަޤާމުން ހުސެއިން ޝަމީމް ވަކިކުރުމުގެ މަސައްކަތް ފަށާފައިވަނިކޮށް، އޭނާ އަމިއްލައަށް އިސްތިއުފާ ދެއްވައިފިއެވެ.

މިއަދު ބޭއްވުނު މަޖިލީހުގެ ޖުޑިޝަރީ ކޮމިޓީގެ ބައްދަލުވުމުގައި، ޝަމީމް މަޤާމުގައި ހުންނަވައިގެން ނާޖާއިޒު ނުފޫޒު ބޭނުންކޮށް ގިނަ މައްސަލަތަކެއް އަނބުރާ ގެނެސް، އަދި ބޮޑެތި އެތައް މައްސަލައެއްގައި ދަޢުވާނުކޮށް ދޫކޮށްލި މައްސަލައިގައި އޭނާ މަޤާމުން ވަކިކުރަން ފެންނަ ކަމަށް ވަނީ ފާސްކޮށްފައެވެ.

ޝަމީމް މަޤާމުން ވަކިކުރަން ނިންމި ސަބަބުތަކުގެ ތެރޭގައި ކުރީގެ ޓުއަރިޒަމް މިނިސްޓަރ އަލީ ވަހީދު އެތައް މުވައްޒަފުންނަކަށް ޖިންސީ ގޯނާކޮށް ރޭޕް ކުރި މައްސަލައިގައި އުފުލި ދަޢުވާތައް އަނބުރާ ގެނައުމާއި، ރައްޔިތުންގެ މަޖިލީހުގެ މެންބަރެއްގެ ގޮތުގައި އަލީ ރިޒާ ހުންނަވަނިކޮށް އޭނާގެ މައްޗަށް އުފުލި މީހުން ޓްރެފިކް ކުރުމުގެ ދަޢުވާ އަނބުރާ ގެނައުމާއި އަދި ކުރީގެ ޔޫތު މިނިސްޓަރ އަހްމަދު މަހްލޫފްގެ މައްޗަށް އެމްއެމްޕީއާރްސީ މައްސަލައިގައި އުފުލި ދަޢުވާ އަނބުރާ ގެނައުން ހިމެނެއެވެ.

މީގެއިތުރުން، ބަނގުރާ ފުޅިއެއް އިންސްޓަގްރާމްގައި ޕޯސްޓް ކުރުމާއި މުވައްޒަފުންގެ މެދުގައި ތަފާތު ކުރުން ގެންގުޅުމަކީ ވެސް އޭނާ މަޤާމުން ދުރުކުރަން ހުށަހެޅި ސަބަބުތަކުގެ ތެރޭގައި ހިމެނޭ ކަންކަމެވެ.

ޕީޖީ އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި ޝަމީމް ވަނީ ކޮމިޓީ ރިޕޯޓު ތަޅުމަށް ހުށަހަޅައި މަޤާމުން ވަކިކުރުމަށް ވޯޓަށް އެހުމުގެ ކުރިން މަޤާމުން އިސްތިއުފާ ދެއްވާނެކަމުގެ އިޝާރާތެއް ކުރައްވާފައެވެ. އިސްތިއުފާ ދިނުމާ ގުޅޭގޮތުން ސުވާލުކުރުމުން އޭނާ ވިދާޅުވީ މަސައްކަތާ ގުޅޭ ހުރިހާކަމެއް ދަސްކުރެއްވީ ކުރީގެ ޕީޖީ އަހުމަދު މުއިއްޒުގެ އަރިހުން ކަމަށާއި އަމަލު ކުރައްވާނީ މުއިއްޒު އަމަލުކުރެއްވި ގޮތަށް ކަމަށެވެ. ފާހަގަކޮށްލެވޭ ކަމަކީ، ކުރީގެ ޕީޖީ މަޤާމުން އިސްތިއުފާ ދެއްވީ، އިތުބާރު ނެތްކަމުގެ މައްސަލައިގައި ވޯޓަށް އެހުމަށް ކުޑަތަންވެފައި ވަނިކޮށް ކަމަށްވުމެވެ.