ރާއްޖޭގެ ތައުލީމީ ދާއިރާއަށް އިންގިލާބީ ބަދަލެއް ގެނައުމަށް 9.5 މިލިއަން ޑޮލަރުގެ މަޝްރޫއެއް ފަށައިފި

ރާއްޖޭގެ ތައުލީމީ ދާއިރާއަށް "އިންގިލާބީ ބަދަލެއް" ގެނައުމަށް ސަރުކާރުން 9.5 މިލިއަން ޑޮލަރުގެ ބޮޑު މަޝްރޫއެއް މިއަދު އިފްތިތާހުކޮށްފިއެވެ.

"ތައުލީމަށް އިންގިލާބީ ބަދަލު" ގެ ނަމުގައި ފެށި މި މަޝްރޫއު އިފްތިތާހުކޮށްދެއްވީ ނައިބު ރައީސް ހުސައިން މުހައްމަދު ލަތީފެވެ.

ގްލޯބަލް ޕާޓްނަޝިޕް ފޯ އެޑިއުކޭޝަން (ޖީޕީއީ)ގެ ހިލޭ އެހީގައި ފަށާ މި މަޝްރޫއަށް ޔުނިސެފާއި ވޯލްޑް ބޭންކުން ވަނީ ފަންޑިންގ ދީފައެވެ. މި މަޝްރޫއުގެ މައިގަނޑު މަގުސަދަކީ ރާއްޖޭގެ ތައުލީމީ ދާއިރާގެ ފެންވަރު ރަނގަޅުކޮށް، ހުރިހާ ދަރިވަރުންނަށް ވެސް ހަމަހަމަ ތައުލީމެއް ދިނުމެވެ.

މި މަޝްރޫއުގެ ދަށުން އިތުރު ސްކޫލުތައް ގާއިމު ކުރުމާއި، ތައުލީމީ ދާއިރާގެ ޕްލޭނިން އާއި މާލީ ގޮތުން ހަރުދަނާ ކުރުމާއި، ޓީޗަރުން ތަމްރީނުކުރުމާއި ކިޔަވައިދިނުމުގެ ފެންވަރު ރަނގަޅު ކުރުން ހިމެނެއެވެ. އަދި ދަރިވަރުންނަށް ރައްކާތެރި މާހައުލަކަށް ސްކޫލުތެރެ ހެދުމާއި، ހުރިހާ ދަރިވަރުންނަށް ވެސް ހަމަހަމަ ކަމާއެކު ކިޔެވުމުގެ ފުރުސަތު ދިނުން ހިމެނެއެވެ.

ޖީޕީއީ މެދުވެރިކޮށް މި މަޝްރޫއަށް ތިން އެހީއެއް ލިބިފައިވެއެވެ. އެއީ ސިސްޓަމް ޓްރާންސްފޮމޭޝަން ގްރާންޓް (5 މިލިއަން ޑޮލަރު)، ސިސްޓަމް ކެޕޭސިޓީ ގްރާންޓް (1.5 މިލިއަން ޑޮލަރު) އަދި މަލްޓިޕްލަޔާ ގްރާންޓް (3 މިލިއަން ޑޮލަރު) އެވެ. މި އެހީތަކުގެ ދަށުން ނުކުޅެދުންތެރިކަން ހުންނަ ކުދިންގެ ތައުލީމު ތަރައްގީކުރުމާއި، ތައުލީމީ ދާއިރާގެ ޕްލޭނިންގ ހަރުދަނާކުރުމާއި، 'އެވިޑެންސް ބޭސްޑް' ނިންމުންތައް ނިންމުމުގެ ގާބިލްކަން އިތުރުކުރުން ހިމެނެއެވެ.

މި އަހަރުން ފެށިގެން 2026 ވަނަ އަހަރަށް ރާއްޖެއަކީ ޖީޕީއީގެ ބޯޑް އޮފް ޑިރެކްޓާސްގެ މެމްބަރެކެވެ. މި މަޝްރޫއަކީ ރާއްޖޭގެ މި މަޝްރޫއަކީ ރާއްޖޭގެ ތައުލީމީ ދާއިރާއަށް ބޮޑު ބަދަލެއް ގެނެސްދޭނެ މަޝްރޫއެއް ކަމަށް ސަރުކާރުން އުންމީދު ކުރެއެވެ.