ވިޔަފާރިއާ ގުޅޭ ތިން ބިލެއް މަޖިލީހުން ފާސްކޮށްފި

ސަރުކާރުގެ ފަރާތުން މަޖިލީހަށް ހުށަހަޅާފައިވާ ވިޔަފާރިއާ ގުޅޭ ތިން ބިލެއް ރައްޔިތުންގެ މަޖިލީހުން މިއަދު  ފާސްކޮށްފިއެވެ.

މި މަހުގެ 13 ވަނަ ދުވަހު މަޖިލީހަށް ހުށަހަޅައި ފުރަތަމަ ކިޔުން އިއްވި މި ތިން ބިލު ވަނީ އެންމެ ދުވަހެއްގެ ތެރޭގައި އިބްތިދާއީ ބަހުސް ނިންމައި ކޮމެޓީއަށް ދިރާސާކުރަން ފޮނުވާފައެވެ. މިއަދު މަޖިލީހުން ފާސްކޮށްފައިވަނީ މި ތިން ބިލެވެ.

ފާސްކުރި ތިން ބިލަކީ:

1. ފޮރިން އިންވެސްޓްމެންޓްގެ ބިލު - ހުށަހެޅުއްވީ ހިތަދޫ މެދު ދާއިރާގެ މެންބަރު އަހްމަދު އަޒާން މަރްޒޫގު

2. ވިޔަފާރި ރަޖިސްޓްރީ ކުރުމުގެ ގާނޫނަށް ހުށަހެޅި ބިލު - ހުށަހެޅުއްވީ ފަރެސްމާތޮޑާ ދާއިރާގެ މެންބަރު އަޝްރަފް ރަޝީދު

3. ރާއްޖޭގެ މާލީ ސެކިއުރިޓީޒްއާ ބެހޭ ގާނޫނު - ހުށަހެޅުއްވީ ކެނދިކުޅުދޫ ދާއިރާގެ މެންބަރު މުހައްމަދު އަފޫ ހާމިދު

މި ތިން ބިލު މަޖިލީހުން ފާސްކޮށްފައިވަނީ ޖަލްސާގައި ބައިވެރިވެވަޑައިގެން ވޯޓު ދެއްވި 77 މެންބަރުންގެ އަޣުލަބިއްޔަތުންނެވެ. ކޮމިޓީ މަރުހަލާގައި މި ތިން ބިލަށް ވެސް މާ ބޮޑު ބަދަލުތަކެއް ގެނެސްފައެއް ނުވެއެވެ.

ފޮރިން އިންވެސްޓްމަންޓް ބިލަކީ ރާއްޖޭގައި ބޭރުގެ ފަރާތްތަކަށް އިންވެސްޓްކުރެވޭނެ ދާއިރާތައް ކަނޑައެޅުމާއި، އެފަދަ ފަރާތްތަކަށް ރާއްޖޭގައި އިންވެސްޓްކުރުމުގެ ހުއްދަ ދޫކުރުމާއި، އިންވެސްޓަރުންނަށް ލިބިދެވޭނެ ހިމާޔަތާއި ރައްކާތެރިކަމާ ގުޅޭ އުސޫލުތައް ބަޔާންކުރާ ބިލެކެވެ.

ވިޔަފާރި ރަޖިސްޓްރީ ކުރުމުގެ ގާނޫނަށް ހުށަހެޅި ބިލަކީ ބޭރުގެ ފަރާތްތަކުން ރާއްޖޭގައި ސެކިއުރިޓީޒްގައި އިންވެސްޓްކުރެވޭނެ ދާއިރާ ކަނޑައެޅުމަށާއި އެ ނޫން ވެސް ކަމާ ގުޅޭ މައިގަނޑު އުސޫލުތައް ބަޔާންކުރުމަށް ހުށަހަޅާފައިވާ ބިލެކެވެ.

ރާއްޖޭގެ މާލީ ސެކިއުރިޓީޒްއާ ބެހޭ ގާނޫނަކީ ވިޔަފާރި ރަޖިސްޓްރީ ކުރުމުގެ ގާނޫނަށް ހުށަހަޅާފައިވާ އިސްލާހާ ގުޅިގެން އެ އިސްލާހާ އެއްގޮތްވާ ގޮތުގެ މަތިން ބޭރުގެ ފަރާތްތަކަށް ރާއްޖޭގައި ހުއްދަކުރެވޭ ސެކިއުރިޓީޒްގެ ބާވަތްތަކުގައި އިންވެސްޓްކުރެވޭނެ އުސޫލުތައް ކަނޑައެޅުމަށްޓަކައި ހުށަހަޅާފައިވާ ބިލެކެވެ.

މި ތިން ބިލަކީ ވެސް 19 ވަނަ މަޖިލީހުގައި އޭރު ވެރިކަމުގައި އޮތް އެމްޑީޕީގެ ފަރާތުން މަޖިލީހަށް ހުށަހަޅާފައިވާ ބިލުތަކެކެވެ. ނަމަވެސް، އޭރުގެ ސަރުކާރުން އެދިގެން ތިން ބިލު ވެސް ވަނީ އަނބުރާ ގެންގޮސްފައެވެ. އަލުން މި ތިން ބިލު މި ސަރުކާރުގެ ފަރާތުން މަޖިލީހަށް ހުށަހަޅާފައި ވަނީ، މާ ބޮޑެތި ބަދަލުތަކެއް ނުގެނެސް، ކުރިން ވެސް ހުރި ކަންކަން ހިމަނައިގެންނެވެ.