ޕްރޮސިކިއުޓަރ ޖެނެރަލް ޝަމީމް ވަކިކުރުމަށް ޖުޑީޝަރީ ކޮމިޓީން ފާސްކޮށްފި

ޕްރޮސިކިއުޓަރ ޖެނެރަލް (ޕީޖީ) ހުސެއިން ޝަމީމް

ޕްރޮސިކިއުޓަރ ޖެނެރަލް (ޕީޖީ) ހުސެއިން ޝަމީމް މަޤާމުން ވަކިކުރުމަށް ރައްޔިތުންގެ މަޖިލީހުގެ ޖުޑީޝަރީ ކޮމިޓީން މިއަދު ފާސްކޮށްފިއެވެ.

މިއަދު ބޭއްވުނު ޖުޑީޝަރީ ކޮމިޓީގެ ބައްދަލުވުމުގައި ޝަމީމް ހާޒިރުވެ، އޭނާ ވަކިކުރުމަށް ހުށަހަޅާފައިވާ މައްސަލައާ ގުޅޭގޮތުން ޖަވާބުދާރީވިއެވެ. މި ބައްދަލުވުން ކުރިއަށް ގެންދިޔައީ ސިއްރުކޮށެވެ.

ޝަމީމްއާ ސުވާލުކުރުމަށްފަހު، ކޮމިޓީން ވަނީ މި މައްސަލައިގައި ގޮތެއް ނިންމާފައެވެ. ޝަމީމް ވަކިކުރުމަށް ނެގުނު ވޯޓުގައި 8 މެންބަރުން ވަނީ ތާއީދުކުރައްވާފައެވެ. އަދި 2 މެންބަރުން ވޯޓު ދެއްވާފައިވަނީ ޝަމީމް ވަކިކުރުމާ ދެކޮޅަށެވެ.

ޝަމީމް މަޤާމުން ވަކިވާނީ މަޖިލީހުގެ ތަޅުމަށް ކޮމިޓީގެ ނިންމުން ހުށަހަޅައި، މުޅި މަޖިލީހުގެ ވޯޓަކުން އެގޮތަށް ފާސްވުމުންނެވެ. މި މައްސަލަ ދެން އޮންނަ މަޖިލީހުގެ ޖަލްސާއަކަށް އެޖެންޑާކުރެވޭނެ ކަމަށް ބެލެވެއެވެ.

ޝަމީމް މަޤާމުން ވަކިކުރުމަށް މަޖިލީހަށް މައްސަލަ ހުށަހެޅުއްވީ ސަރުކާރު ހިންގާ ޕީއެންސީއަށް ނިސްބަތްވާ ހުޅުދޫ ދާއިރާގެ މެންބަރު މުޙައްމަދު ޝާހިދެވެ. އޭނާ ވަނީ ޝަމީމް ވަކިކުރަންޖެހޭ 8 ސަބަބެއް ބަޔާންކުރައްވާފައެވެ.

ޝަމީމް ވަކިކުރަންޖެހޭ މައިގަނޑު ސަބަބުތަކުގެ ތެރޭގައި، ޖިނާއީ ޢަދުލުގެ ނިޒާމުގައި ޤާއިމުވެފައިވާ އުސޫލުތަކާ ޚިލާފަށް ކުރީގެ ސަރުކާރުގެ ވެރިންނާ ގުޅޭ ބައެއް ބޮޑެތި މައްސަލަތައް އަނބުރާ ގެނައުން ހިމެނެއެވެ.

ޕީޖީ ރައްޔިތުންގެ މަޖިލިސް