ދައުލަތުގެ ޑޮލަރު ރިޒާވު ހުސްވެއްޖެކަމަށް ބުނާ ޚަބަރަކީ ދޮގެއް: މިނިސްޓަރު ސައީދު

ދައުލަތުގެ ބޭނުންކުރެވޭ ޑޮލަރު ރިޒާވު އެއްކޮށް ހުސްވެއްޖެ ކަމަށް ބުނެ ފަތުރަމުންދާ ޚަބަރަކީ ކަނޑައެޅިގެން ދޮގު ޚަބަރެއް ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.

ދިވެހި ތާރީޚުގައި ފުރަތަމަ ފަހަރަށް ދައުލަތުގެ ބޭނުންކުރެވޭ ޑޮލަރު ރިޒާވު މައިނަސްވެއްޖެ ކަމަށް ބުނެ "އަދަދު ނޫސް" އިން ވަނީ ރިޕޯޓުކޮށްފައެވެ. އެ ނޫހުގެ ރިޕޯޓުގައި ބުނެފައިވަނީ މިއަދު ދައްކަންޖެހޭ 25 މިލިއަން ޑޮލަރުގެ ތެޔޮ ބިލެއް ދެއްކުމުން ބޭނުންކުރެވޭ ޑޮލަރު ރިޒާވު މައިނަސްވީ ކަމަށެވެ. ނަމަވެސް މި ރިޕޯޓުގައި އެމްއެމްއޭ އާއި ފިނޭންސް މިނިސްޓްރީގެ ބަހެއް ހިމަނާފައެއް ނުވެއެވެ.

މި ވާހަކަތައް ދޮގުކުރައްވައި މިނިސްޓަރު ސައީދު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ އެ ޚަބަރަކީ "ކަނޑައެޅިގެން ބުހުތާނު ދޮގު ޚަބަރެއް" ކަމަށެވެ.

މި މައްސަލައާ ގުޅޭގޮތުން އެމްއެމްއޭއިން މިދިޔަ އާދިއްތަ ދުވަހު މީޑިއާއަށް މަޢުލޫމާތު ދެމުން ބުނެފައިވަނީ ޖުލައި މަސް ނިމުނު އިރު ބޭނުންކުރެވޭ ރިޒާވްގައި 45 މިލިއަން ޑޮލަރު ހުރި ކަމަށެވެ. އަދި މިދިޔަ ޑިސެމްބަރު މަހުން ފެށިގެން ސޮވެރިން ޑިވެލޮޕްމެންޓް ފަންޑަށް ޖަމާވާ ބޭރުފައިސާ އެމްއެމްއޭއަށް މާރުކުރުމުގެ ބަދަލުގައި ޑޮލަރުން ބެހެއްޓުމަށް ނިންމި ކަމަށާއި، ޖުލައި މަހު ބޭނުންކުރެވޭ ރިޒާވްގައި ހުރި 45 މިލިއަން ޑޮލަރުގެ ހިސާބުގައި އެސްޑީއެފްގައި ހުރި 65 މިލިއަން ޑޮލަރު ނުހިމެނޭ ކަމަށްވެސް އެމްއެމްއޭއިން ބުނެފައިވެއެވެ.

އިތުރަށް، ރާއްޖޭގެ އިޤްތިޞާދު އަދި މާލީ ހާލަތު ރަނގަޅުކުރުމަށް ސަރުކާރުގެ ވުޒާރާތަކާއި، މާލީ ވުޒާރާއާ އެކު ވަރަށް ގާތުން މަސައްކަތް ކުރަމުންދާ ކަމަށް މަރުކަޒީ ބޭންކުން ބުނެފައިވެއެވެ. މި މަސައްކަތްތަކުގެ ނަތީޖާއެއްގެ ގޮތުން މިހާރު ލިބިފައިވާ މަޢުލޫމާތުތަކަށް ބިނާކޮށް އަންދާޒާ ކުރެވޭ ގޮތުގައި އޮގަސްޓް މަހު ރިޒާވްގެ ހާލަތު ރަނގަޅުވާނެ ކަމަށް ގަބޫލުކުރެވޭ ކަމަށްވެސް މަރުކަޒީ ބޭންކުން ވަނީ ބުނެފައެވެ.