ޑރ. ޝަހީމް އޯއައިސީގެ ފިގުހު އެކަޑަމީގެ މެންބަރަކަށް އައްޔަންކޮށްފި

އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު، އޮގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ އިންޓަރނޭޝަނަލް އިސްލާމިކް ފިގުހު އެކަޑަމީގެ މެމްބަރަކަށް އައްޔަންކުރައްވައިފި އެވެ.

އިސްލާމިކް މިނިސްޓރީން ކުރި އެކްސް ޕޯސޓެއްގައި ވިދާޅުވީ މި މަހުގެ 8 ވަނަ ދުވަހު އޮގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ އިންޓަރނޭޝަނަލް އިސްލާމިކް ފިގުހުއެކަޑަމީން ބޭއްވި ބައްދަލުވުމަކުން ، އެ އެކަޑަމީގެ މެމްބަރަކަށް މިނިސްޓަރު ޝަހީމް އައްޔަންކުރައްވާފައިވާ ކަމަށެވެ.

ޑރ. ޝަހީމަކީ އޯއައިސީއަށް ގިނަގުނަ ޚިދުމަތްތަކެއް ކުރައްވާފައިވާ ބޭފުޅެކެވެ. މީގެ ކުރިން އެ ޖަމްޢިއްޔާގެ ސެކްރެޓަރީ ޖެނެރަލްގެ އެޑްވައިޒަރުކަން ކުރައްވާފައިވާ ޑރ.ޝަހީމަކީ ދުނިޔޭގެ އެންމެ ނުފޫޒު ގަދަ 500 މުސްލިމު ލީޑަރުންގެ ލިސްޓުގައި ވެސް ހިމެނިވަޑައިގަންނަވާ ބޭފުޅެކެވެ.

ދިވެހިރާއްޖޭގެ ސިޔާސީ މައިދާނުގައި ވެސް ޑރ. ޝަހީމަކީ ފާހަގަކޮށްލެވޭ ބޭފުޅެކެވެ. އެމަނިކުފާނަކީ އިސްލާމިކް މިނިސްޓަރުގެ މަޤާމު އެންމެ ގިނަ ސަރުކާރުގައި ފުރުއްވާފައިވާ ބޭފުޅާއެވެ. މިހާރުގެ ރައީސް ޑރ. މުޙައްމަދު މުޢިއްޒުގެ ސަރުކާރުގެ އިތުރުން، ކުރީގެ ރައީސް ޢަބްދުﷲ ޔާމީނާއި ކުރީގެ ރައީސް ޑރ. މުޙައްމަދު ވަޙީދު ޙަސަން މަނިކުގެ ވެރިކަމުގައި ވެސް އިސްލާމިކް މިނިސްޓަރުކަން ކުރައްވާފައިވެއެވެ.

ތަޢުލީމީ ދާއިރާއިން ބަލާއިރު، މަދީނާ ޔުނިވަރސިޓީން ތަޢުލީމު ހާސިލުކުރައްވާފައިވާ ޑރ. ޝަހީމް ވަނީ ރާއްޖޭގެ މަތީ ތަޢުލީމުގެ ޚިދުމަތް ފޯރުކޮށްދޭ ގިނަ މަރުކަޒުތަކުގައި އިސް މަޤާމުތައް ފުރުއްވާފައެވެ. އޭގެ ތެރޭގައި އިސްލާމިކް ޔުނިވަރސިޓީގެ ޗާންސެލަރުކަމާއި، ވިލާ ކޮލެޖުގެ ފެކަލްޓީ އޮފް ޝަރީޢާގެ ޑީންކަމުގެ އިތުރުން ކީރިތި ޤުރުއާނާބެހޭ މަރުކަޒުގެ މުޝްރިފް މުސާއިދުގެ މަޤާމު ހިމެނެއެވެ.