މިއަހަރުގެ މިހާތަނަށް ރާއްޖެއަށް 1.3 މިލިއަން ފަތުރުވެރިން ޒިޔާރަތްކޮށްފި

ސަރުކާރުގެ އަމާޒަކީ މިއަހަރު ނިމުމުގެ ކުރިން ދެ މިލއަން ފަތުރުވެރިން ރާއްޖެ ގެނައުން

ޓުއަރިޒަމް މިނިސްޓްރީން އާންމުކުރި އެންމެފަހުގެ ޑެއިލީ އަޕްޑޭޓްސް ރިޕޯޓުގައިވާ ގޮތުން، މިއަހަރުގެ އޮކްޓޯބަރު މަހުގެ 19 ވަނަ ދުވަހުގެ ނިޔަލަށް ރާއްޖެއަށް 1.3 މިލިއަން ފަތުރުވެރިން ޒިޔާރަތްކޮށްފިއެވެ.

މިއީ މިދިޔަ އަހަރުގެ މި މުއްދަތާ އަޅާބަލާއިރު 10.4 އިންސައްތައިގެ ކުރިއެރުމެކެވެ. މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކޮށްފައިވަނީ 1.1 މިލިއަން ފަތުރުވެރިންނެވެ.

މިނިސްޓްރީގެ ތަފާސްހިސާބުތަކުން ދައްކާގޮތުގައި، މިހާރު ރާއްޖެއަށް ދުވާލަކު 6000 އަށްވުރެ ގިނަ ފަތުރުވެރިން ޒިޔާރަތްކުރެއެވެ. އަދި އާންމުކޮށް ކޮންމެ ފަތުރުވެރިޔަކު ރާއްޖޭގައި 7 ދުވަހުގެ ޗުއްޓީއެއް ހޭދަކުރެއެވެ.

އެންމެ ގިނަ ފަތުރުވެރިން ޒިޔާރަތްކުރާ ޤައުމުތަކުގެ ތެރޭގައި ޗައިނާ (14.2% ހިއްސާއާއެކު)، ރަޝިއާ، އިނގިރޭސިވިލާތް، އިޓަލީވިލާތް އަދި ޖަރުމަނުވިލާތް ހިމެނެއެވެ.

ޗައިނާއިން 136,728 ފަތުރުވެރިން ޒިޔާރަތްކޮށްފައިވާއިރު، ރަޝިއާއިން 114,981 ފަތުރުވެރިން ޒިޔާރަތްކޮށްފައިވެއެވެ.

ސަރުކާރުގެ އަމާޒަކީ މިއަހަރު 2 މިލިއަން ފަތުރުވެރިން ރާއްޖެއަށް ގެނައުމެވެ. މި އަމާޒުގެ 50 އިންސައްތަ ޖޫން މަހުގެ 27 ވަނަ ދުވަހު ވަނީ ހާސިލުކުރެވިފައެވެ. މިހާތަނަށް ލިބިފައިވާ ކުރިއެރުމަށް ބަލާއިރު، މި އަމާޒު ހާސިލުކުރެވޭނެ ކަމަށް ބެލެވެއެވެ.

ފަތުރުވެރިކަން