ސަރުކާރު ކުންފުނިތަކަށް ފުރަތަމަ ކުއާޓަރުގައި 1.33 ބިލިއަން ރުފިޔާ ދޫކޮށްފި

ސަރުކާރުގެ ކުންފުނިތައް ބަލަހައްޓާ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ) އިން އާންމުކުރި ތަފާސްހިސާބުތަކުން ދައްކާގޮތުގައި މިއަހަރުގެ ފުރަތަމަ ތިން މަސްދުވަހުގެ ތެރޭގައި ސަރުކާރުގެ ކުންފުނިތަކަށް ބަޖެޓުން 1.33 ބިލިއަން ރުފިޔާ ހަރަދުކޮށްފައިވެއެވެ.

ޕީސީބީން އާންމުކޮށްފައިވާ މިއަހަރުގެ ފުރަތަމަ ކުއާޓަރުގެ އެސްއޯއީ ރިޕޯޓުގައިވާ ގޮތުން، މިއީ މިދިޔަ އަހަރުގެ މި މުއްދަތާ އަޅާބަލާއިރު 12 މިލިއަން ރުފިޔާ ނުވަތަ 1 އިންސައްތަ ދަށް އަދަދެކެވެ. މިދިޔަ އަހަރުގެ ފުރަތަމަ ކުއާޓަރުގައި ސަރުކާރު ކުންފުނިތަކަށް ދޫކޮށްފައިވަނީ 1.34 ބިލިއަން ރުފިޔާއެވެ.

ރިޕޯޓުގެ ތަފާސްހިސާބުތަކުން ދައްކާގޮތުން، ސަރުކާރު ކުންފުނިތަކަށް ބަޖެޓުން އެންމެ ގިނައިން ފައިސާ ދޭންޖެހިފައިވަނީ ސަބްސިޑީގެ ގޮތުގައެވެ. އެގޮތުން ސަބްސިޑީގެ ގޮތުގައި 1.2 ބިލިއަން ރުފިޔާ ދޫކޮށްފައިވެއެވެ. މިއީ 2 އިންސައްތައިގެ އިތުރުވުމެކެވެ. ދެން އެންމެ ގިނައިން ފައިސާ ދޫކޮށްފައިވަނީ ކެޕިޓަލްގެ ގޮތުގައި 164.9 މިލިއަން ރުފިޔާ އަދި ގްރާންޓުގެ ގޮތުގައި 60.5 މިލިއަން ރުފިޔާއެވެ.

މިއަހަރުގެ ފުރަތަމަ ކުއާޓަރުގައި ބަޖެޓުން އެންމެ ބޮޑު އަދަދެއް ދޫކޮށްފައިވަނީ ހުޅުމާލެ ބަލަހައްޓާ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އަށެވެ. އެ ކުންފުންޏަށް 484.8 މިލިއަން ރުފިޔާ ދޫކޮށްފައިވާއިރު، އޭގެ ތެރެއިން 84.8 މިލިއަން ރުފިޔާ ދޫކޮށްފައިވަނީ ހިންގުމުގެ ހަރަދަށް ކަމަށް ރިޕޯޓުގައި ބަޔާންކޮށްފައިވެއެވެ.

ދެން ބަޖެޓުން އެންމެ ގިނައިން ފައިސާ ދޫކުރި ކުންފުނިތަކުގެ ތެރޭގައި ހިމެނެނީ:

- އެސްޓީއޯ: 359.33 މިލިއަން ރުފިޔާ (ކާޑާއި ތެލުގެ ސަބްސިޑީއަށް)

- ފެނަކަ: 249.9 މިލިއަން ރުފިޔާ (ކަރަންޓް ބިލް އަގުހެޔޮކުރަން ސަބްސިޑީއަށް)

- އެމްއެމްޕީއާރުސީ: 38.55 މިލިއަން ރުފިޔާ (ރާއްޖެ ޕްރޮމޯޓް ކުރަން އެހީގެ ގޮތުގައި)

- އެސްޑީއެފްސީ: 30 މިލިއަން ރުފިޔާ

- ފަންޑް މެނޭޖްމަންޑް ކޯޕަރޭޝަން: 28.13 މިލިއަން ރުފިޔާ (ހިންގުމުގެ ހަރަދަށް)

މީގެ އިތުރުން، ރީޖަނަލް އެއާޕޯޓްސް، އައްޑޫ އެއާޕޯޓް، ޕީއެސްއެމް އަދި ވެމްކޯ ފަދަ ކުންފުނިތަކަށްވެސް އެކި މިންވަރުން ފައިސާ ދޫކޮށްފައިވެއެވެ. އަދި ޕޯސްޓް އޮފީސް، ބީސީސީ، ޓްރޭޑްނެޓް އަދި ފަހި ދިރިއުޅުން ކުންފުންޏަށް ޖުމްލަ 19.4 މިލިއަން ރުފިޔާ ހިންގުމަށް ދޫކޮށްފައިވެއެވެ.

މި އަހަރަށް ސަރުކާރުން ހުށަހަޅާފައިވާ 50 ބިލިއަން ރުފިޔާގެ ބަޖެޓުގެ 3 އިންސައްތައަށް ވުރެ ބޮޑު އަދަދެއް ވަނީ ކުންފުނިތަކަށް ކެޕިޓަލްގެ ގޮތުގައި ދިނުމަށް ކަނޑައަޅާފައެވެ. ނަމަވެސް، މި އަދަދަށް ވުރެ އިތުރަށް ކޮންމެ އަހަރަކުވެސް ބިލިއަނެއްހާ ރުފިޔާ ކުންފުނިތަކަށް ދޭން ޖެހޭކަން ފާހަގަކުރެވެއެވެ.