ޗެލްސީގެ ދެވަނަ މެޗުންވެސް ސްޓާލިން އަށް ޖާގައެއް ނުދިން

ޔޫއެފާ ޔޫރަޕާ ކޮންފަރެންސް ލީގުގެ ޕްލޭ އޮފް މަރުޙަލާގައި ސްވިޒަލޭންޑްގެ ސަރވެޓް އާ ދެކޮޅަށް އަންނަ ބުރާސްފަތި ދުވަހު ކުޅޭ މެޗަށް ޗެލްސީން ޔޫއެފާގައި ރަޖިސްޓަރީކުރި ސްކޮޑުން ޗެލްސީގެ ވިންގަރ ރަހީމް ސްޓާލިންގ އުނިކޮށްފިއެވެ.

ވިދިވިދިގެން ދެވަނަ ފަހަރަށް ޗެލްސީގެ މެޗު ސްކޮޑުން ސްޓާލިންގއަށް ފުރުސަތު ގެއްލިފައިވާއިރު، އޭނާ ވަނީ ޕްރިމިއަރ ލީގުގެ ފުރަތަމަ މެޗުގައި މެންޗެސްޓަރ ސިޓީއާ ދެކޮޅަށް ކުޅުނު މެޗުން ފުރުސަތު ނުލިބުމާ ގުޅިގެން ހިތްހަމަނުޖެހުން ފާޅުކޮށްފައެވެ. މީގެ އިތުރުން، ޗެލްސީގައި ސްޓާލިންގގެ މުސްތަޤުބަލާ މެދު ސުވާލު އުފެދިފައިވާތީ، އެކަން ސާފުކުރަންޖެހޭ ކަމަށް ބުނެ އޭނާގެ ފަރާތުން ވަނީ ކުރިން ބަޔާނެއްވެސް ނެރެފައެވެ.

މި ސީޒަނަށް ތައްޔާރުވުމުގެ ގޮތުން ޗެލްސީން ވަނީ 185 މިލިއަން ޕައުންޑް (ގާތްގަނޑަކަށް 236 މިލިއަން ޑޮލަރު) ޚަރަދުކޮށް 11 އައު ކުޅުންތެރިން ގެނެސްފައެވެ. މިކަމުގެ ސަބަބުން ކްލަބުގެ ހެޑް ކޯޗު މައުރީސިއޯ ޕޮޗެޓީނޯއަށް ފުރަތަމަ ޓީމު އެކުލަވާލުމަށް 40 ކުޅުންތެރިންގެ ފުޅާ ސްކޮޑެއް ލިބިފައިވެއެވެ.

ސްޓާލިންގ 2022 ވަނަ އަހަރު ޗެލްސީއާ ގުޅުނީ މެންޗެސްޓަރ ސިޓީން 50 މިލިއަން ޕައުންޑް (ގާތްގަނޑަކަށް 63.7 މިލިއަން ޑޮލަރު)ގެ ޓްރާންސްފަރ ފީއަކަށެވެ. މި މުއްދަތުގެ ތެރޭގައި ޗެލްސީއަށް ކުޅެދިން މެޗުތަކުގައި ސްޓާލިންގ ވަނީ 19 ލަނޑު ޖަހާފައެވެ.

ޔޫރަޕާ ކޮންފަރެންސް ލީގުގެ ޕްލޭއޮފް މެޗަށް ޗެލްސީން ތައްޔާރުވަމުންދާއިރު، ޕްރިމިއަރ ލީގުގެ ފުރަތަމަ މެޗުގައި ޗެލްސީ ވަނީ މެންޗެސްޓަރ ސިޓީއަށް 2-0 ގެ ނަތީޖާއަކުން ބަލިވެފައެވެ. މި ހާލަތުގައި ކްލަބުގެ ކުރިމަގާމެދު ގިނަ ސުވާލުތަކެއް އުފެދިފައިވާކަން ފާހަގަކުރެވެއެވެ.