މިނިސްޓަރު ޒަމީރު ސައުދީގެ މަރުކަޒީ ބޭންކުގެ ގަވަރުނަރާ ބައްދަލުކުރައްވައިފި

ގަވަރުނަރާއިއެކު ބޭއްވުނު ބައްދަލުކުރެއްވުމުގެ ތެރެއިން / ފޮޓޯ:ފޮރިން މިނިސްޓްރީ

ފޮރިން މިނިސްޓަރު މޫސާ ޒަމީރު، ސައުދީ އަރަބިއްޔާގެ މަރުކަޒީ ބޭންކުގެ ގަވަރުނަރު އައިމަން އަލް ސަޔާރީއާ ބައްދަލު ކުރައްވައި، ރާއްޖޭގެ އިގްތިސާދީ ހާލަތާ ގުޅޭ ގޮތުން މަޝްވަރާ ކުރައްވައިފި އެވެ.

ރައީސް މުހައްމަދު މުއިއްޒު ސައުދީގެ ވަލީއަހުދު މުހައްމަދު ބިން ސަލްމާންއަށް ފޮނުއްވި ހާއްސަ ސިޓީއެއް ރައްދު ކުރެއްވުމަށާއި އެ ގައުމުގެ ހާރިޖީ ވަޒީރު ފައިސަލް ބިން ފަރުހާން އަލް ސައުދުގެ ދައުވަތަކަށް، ޒަމީރު ސައުދީއަށް ވަޑައިގެންނެވީ މިދިޔަ ހޮނިހިރު ދުވަހު އެވެ.

ފޮރިން މިނިސްޓްރީން އެކްސް ޕޯސްޓެއްގައި ހާމަކުރި ގޮތުގައި، ޒަމީރު ސައުދީގެ ގަވަރުނަރާ އެކު ބޭއްވި ބައްދަލުވުމުގައި ރާއްޖޭގެ އިގްތިސާދީ ހާލަތުގެ އިތުރުން، ފަތުރުވެރިކަމުގެ ސިނާއަތުގެ ކުރިއެރުމާއި ރާއްޖޭގައި އިންވެސްޓު ކުރުމަށް ހުރި ފުރުސަތުތަކާ ގުޅޭ ގޮތުން ވެސް މަޝްވަރާކުރެއްވި އެވެ.

ޒަމީރު އެކްސްގައި ވިދާޅުވިގޮތުގައި ކަރަންޓް އެކައުންޓް ޑެފިސިޓްގެ ގޮންޖެހުންތައް ނައްތާލުމަށްޓަކައި ބައިލެޓަރަލް ޓްރޭޑް ފުޅާކުރުމުގެ ފުރުސަތުތަކާ ބެހޭގޮތުން ވެސް މަޝްވަރާކުރެއްވި އެވެ.

ޒަމީރާއެކު މި ދަތުރުފުޅުގައި އެމްއެމްއޭގެ ގަވަރުނަރު އަހުމަދު މުނައްވަރާއި އެއާޕޯޓްސް ކޮމްޕެނީގެ މެނޭޖިން ޑިރެކްޓަރު އިބްރާހިމް ޝަރީފް މުހައްމަދު ބައިވެރިވެވަޑައިގަންނަވަ އެވެ. މި ވަފްދުން އިއްޔެ ވަނީ ސައުދީގެ ހާރިޖީ ވަޒީރު ފައިސަލްއާ ބައްދަލު ކޮށްފައެވެ. އަދި އެ ބައްދަލުވުމުގައި، ރައީސް މުއިއްޒު ވަލީއަހުދުއަށް ފޮނުއްވި ސިޓީ ރައްދުކޮށްފައިވެ އެވެ.

މޫސާ ޒަމީރު