ގުންޑޮގާން، ޖަރުމަން ގައުމީ ޓީމަށް ކުޅުން ހުއްޓާލައިފި

ބާސެލޯނާގެ ޖަރުމަނު މިޑްފީލްޑަރު، އިލްކާއި ގުންޑޮގާން، ގައުމީ ޓީމުން މުސްކުޅިކުރާ ކަމަށް ރަސްމީކޮށް އިޢުލާނުކޮށްފިއެވެ.

އިޖުތިމާޢީ މީޑިއާގައި ޝާއިޢުކުރި ބަޔާނެއްގައި 33 އަހަރުގެ ގުންޑޮގާން ހާމަކުރި ގޮތުގައި، ގައުމީ ޓީމުން މުސްކުޅިކުރުމަށް ނިންމީ ދިގު މުއްދަތެއްގެ ވިސްނުމަށްފަހުގައެވެ.

ފާއިތުވި މޫސުމުގައި މެންޗެސްޓަރ ސިޓީން ބާސެލޯނާއަށް ބަދަލުވި ގުންޑޮގާން، ގައުމީ ޓީމަށް ފުރަތަމަ ކުޅެން ފެށީ 2011 ވަނަ އަހަރުގައެވެ. އެއަށްފަހު، މުސްކުޅިކުރުމާ ހަމައަށް، އެންމެ ފަހުން ބޭއްވުނު ޔޫރޯ ފުޓުބޯޅަ މުބާރާތުގެ ނިޔަލަށް އޭނާ ވަނީ 82 މެޗު ކުޅެ، 19 ލަނޑު ޖަހާފައެވެ.

ގައުމީ ޓީމަށް ކުޅުނު ގިނަ މެޗުތަކާ ގުޅޭގޮތުން ގުންޑޮގާން ބުނީ، ބައިނަލްއަޤްވާމީ ފެންވަރުގައި 82 މެޗުގައި ގައުމު ތަމްސީލުކުރުމުގެ ފުރުޞަތު ލިބުމާމެދު ޝުކުރުވެރިވެ، ފަޚުރުވެރިވާ ކަމަށެވެ. އަދި އެއީ ކުރިން ހުވަފެނުންވެސް ދެކެފައިނުވާ ކަމެއްގެ ގޮތުގައި ގުންޑޮގާން ސިފަކޮށްފައިވެއެވެ.

ޖަރުމަނުގައި ބޭއްވުނު އެންމެ ފަހުގެ ޔޫރޯގައި އޭނާ ވަނީ އެ ޓީމުގެ ހުރިހާ މެޗެއްގައި ބައިވެރިވެފައެވެ. އެ މުބާރާތުގައި ޓީމުގެ ކެޕްޓަންކަން ކުރި ގުންޑޮގާން އެންމެ ފަހުން ކުޅުނު ބައިނަލްއަޤްވާމީ މެޗަކީ ޗެމްޕިއަންކަން ހޯދި ސްޕެއިނާ ދެކޮޅަށް ކުޅުނު ކުއާޓަރ ފައިނަލް މެޗެވެ.

"އަހަރެންގެ އެންމެ ފާހަގަކޮށްލެވޭ ތަޖުރިބާއަކީ އަމިއްލަ ގައުމުގައި ބޭއްވުނު ޔޫރަޕިއަން ޗެމްޕިއަންޝިޕްގައި ޖަރުމަނު ޓީމުގެ ކެޕްޓަނެއްގެ ގޮތުގައި ކުޅުމުގެ ޝަރަފު ލިބުން،" ގުންޑޮގާން ބުންޏެވެ.

ގުންޑޮގާން އިތުރަށް ބުނީ، މުބާރާތުގެ ކުރީން ވެސް އޭނާ އަށް ހުރިހާ ގޮތަކުން ވަރުބަލިކަން އިހުސާސްކުރެވުނު ކަމަށާއި، އެހާ ހިސާބުން ވެސް ކުޅުން ހުއްޓާލުމާ މެދު ވިސްނަންފެށި ކަމަށެވެ. އަދި ކުރިއަށް އޮތް ތަނުގައި ވެސް ކްލަބު ފުޓްބޯޅައިގައި އާއި ގައުމީ ޓީމަށް ކުޅެންޖެހޭ މެޗުތަކުގެ އަދަދު މަދުވާނެކަމަށް ނުބެލެވޭ ކަމަށް ވެސް ގުންޑޮގާން ފާހަގަކުރިއެވެ.