ބިދޭސީންނާ ގުޅޭ ފީތައް ބޮޑުކުރުމުގެ ވިސްނުމެއް ނެތްކަމަށް ދާޚިލީ ވަޒީރު ވިދާޅުވެއްޖެ
މިއަދު ކުރިއަށް ގެންދެވުނު ބައްދަލުވުމުގެ ތެރެއިން
ރާއްޖެއަށް ބިދޭސީން ގެނެސް، އެމީހުންނަށް ވަޒީފާދޭ ފަރާތްތަކުން ދިވެހި ދައުލަތަށް ދައްކަންޖެހޭ އެއްވެސް ފީއެއް ބޮޑުކުރުމުގެ ވިސްނުން ސަރުކާރުން ނުގެންގުޅުއްވާކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.
ވަޒީރު މިހެން ވިދާޅުވީ ރާއްޖޭގައި ބިދޭސީންނަށް ވަޒީފާދޭ ފަރާތްތަކާ ބައްދަލުކުރައްވާ ދެއްކެވި ވާހަކަފުޅުގައެވެ.
ދާޚިލީ ސަލާމަތާ ބެހޭ ވުޒާރާއިން ވަނީ ވަޒީފާ އަދާކުރާ ބިދޭސީންނާ ގުޅިގެން ދައުލަތަށް ދައްކަންޖެހޭ ފީތަކާއި ޖޫރިމަނާގެ ޢަދަދު އެއްލައްކަ ރުފިޔާއަށްވުރެ މައްޗަށް އަރާފައިވާ ކުންފުނިތަކާއި މީހުންގެ ނަންތައް ޢާންމުކޮށްފައެވެ. އަދި މި ފީތައް ދެއްކުމަށް މި މަހުގެ ނިޔަލަށް މުހުލަތެއް ދީފައިވެއެވެ.
ވަޒީރު އިތުރަށް ވިދާޅުވީ ބައެއް ކުންފުނިތަކުން ބޮޑެތި ޢަދަދުތަކުން ފީ ދައްކަން ޖެހޭކަން ފާހަގަކުރައްވާ، އެފަދަ ފަރާތްތަކުން އެއްބަސްވާނަމަ 12 މަސް ދުވަހަށް ބަހާލައިގެން ފީ ދެއްކޭނެ އިންތިޒާމް ހަމަޖައްސައި ދެއްވާނެކަމަށެވެ. އަދި ބިދޭސީންނާގުޅޭ ފީތައް ބަލްކްކޮށް ދެއްކޭނެ އިންތިޒާމް މިހާރު ހަމަޖައްސާފައިވާ ކަމަށާއި، އެކްސްޕެޓް ސިސްޓަމް މެދުވެރިކޮށް މި ފީތައް ދެއްކޭނެކަމަށްވެސް ވަޒީރު ވިދާޅުވިއެވެ.
ވަޒީފާއާބެހޭ ޤާނޫނަށް ގެނެވުނު އިސްލާޙާ ގުޅިގެން ވަރކް ޕާމިޓް އަދި ބިދޭސީންގެ ކޯޓާ ފީ ބޮޑުކުރުމުގެ އިޚްތިޔާރު ކަމާބެހޭ އިދާރާއަށް ލިބުނު ނަމަވެސް، މި ފީތައް ބޮޑުކުރުމުގެ ވިސްނުމެއް ސަރުކާރުން ނުގެންގުޅުއްވާކަން ވަޒީރުގެ ވާހަކަފުޅުން ހާމަވެއެވެ.
ކޮމެންޓް