ސްކޭމްތަކާ ދެކޮޅަށް އެމްޑީޕީން ހުށަހެޅި ބިލު މަޖިލީހުން ބަލައިގަނެފި

ސްކޭމްތަކާ ދެކޮޅަށް އިދިކޮޅު އެމްޑީޕީން ހުށަހެޅި ބިލު ރައްޔިތުންގެ މަޖިލީހުން މިއަދު ބަލައިގަނެ، އެ ބިލު ކޮމިޓީއަށް ފޮނުވައިފިއެވެ.

މި ބިލަކީ މަކަރާއި ހީލަތުގެ މައްސަލަތަކުގައި ފައިސާގެ ދައުރުކުރުން ހުއްޓުވުމަށް ބޭންކް އެކައުންޓުތައް ކޯޓު އަމުރެއް ނެތި ހިފެހެއްޓުމުގެ ބާރު ފުލުހުންނަށް ދިނުމަށް އެމްޑީޕީގެ ފަރާތުން ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ހުށަހަޅުއްވާފައިވާ ބިލެކެވެ.

ޖިނާއީ އިޖުރާއަތުގެ ގާނޫނުގެ 73 ވަނަ މާއްދާއަށް ހުށަހެޅި މި އިސްލާހު ބަލައިގަންނަން ފާސްކުރީ މަޖިލީހުގެ ޖަލްސާގައި ބައިވެރިވެވަޑައިގެން ވޯޓު ދެއްވި 72 މެންބަރުންގެ އަގުލަބިއްޔަތުންނެވެ.

މި ބިލުގެ ދަށުން، ސަބް އިންސްޕެކްޓާ އޮފް ޕޮލިސްގެ ރޭންކުން ފެށިގެން މަތީ އޮފިސަރަކަށް އެކައުންޓުގައިވާ ފައިސާ ނުވަތަ ފައިސާ ޓްރާންސްފާ ކޮށްފައިވާ އެހެން އެކައުންޓުތަކުގެ ފައިސާ ހިފެހެއްޓުމަށް ނުވަތަ އެ ފައިސާއިން މުއާމަލާތް ކުރުން ހުއްޓުވުމުގެ އަމުރެއް ނެރެވިދާނެއެވެ. އަދި މިފަދަ އަމުރެއް ލަސްނުކޮށް އެ އެކައުންޓު ހުޅުވާފައިވާ ބޭންކު ނުވަތަ އިދާރާއަށާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ)އަށް އަންގަންވާނެއެވެ.

މި އިސްލާހުތަކަށް އަމަލު ކުރަން ފަށާނީ ބިލު ގާނޫނަކަށްވެ، ސަރުކާރުގެ ގެޒެޓްގައި ޝާއިއު ކުރާ ދުވަހުން ފެށިގެންނެވެ.

އެހެންނަމަވެސް، މި ބިލަށް ވާހަކަ ދެއްކެވި ޕީއެންސީގެ ގިނަ މެންބަރުން މިއަދު ވިދާޅުވެފައިވަނީ ބޭންކް އެކައުންޓުތައް ކޯޓު އަމުރެއް ނެތި ހިފެހެއްޓުމުގެ ބާރު ފުލުހުންނަށް ދިން ނަމަވެސް ބޭންކިންގެ ގަނޫނަށް ބަދަލު ނުގެނެސް ސްކޭމްތައް ނުހުއްޓުވޭނެ ކަމަށެވެ.

މި ބިލު ފާސްވެއްޖެނަމަ، ސްކޭމްތަކާއި މަކަރާއި ހީލަތުގެ މައްސަލަތައް ހުއްޓުވުމަށް ފުލުހުންނަށް އިތުރު ބާރުތަކެއް ލިބިގެންދާނެ ކަމަށް ބެލެވެ.