ބުޅާ މަހުން ކާބޯތަކެތި އުފައްދާ ކަމަށް ތުހުމަތުކުރެވޭ ބިދޭސީ މީހާ ހައްޔަރުކޮށްފި

ބުޅާމަސްބޭނުންކޮށްގެން ކާތަކެތި އުފައްދާކަމުގެ ތުހުމަތުގައި ހައްޔަރުކުރެވުނު މީހާ

މާލޭގެ އެކި ސަރަހައްދުތަކުން ބުޅާ ހިފައިގެން ގޮސް އޭގެ މަހުން ކާބޯތަކެތި އުފައްދައި ވިއްކާ ކަމަށް ތުހުމަތު ކުރެވޭ ބަންގްލަދޭޝްއަށް ނިސްބަތްވާ މީހަކު މިއަދު ހެނދުނު ހައްޔަރުކޮށް، އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.

އިމިގްރޭޝަން ކޮންޓްރޯލާ މުހައްމަދު ޝަމްއާން ވަހީދު މިއަދު ވިދާޅުވި ގޮތުގައި، އިއްޔެ އިމިގްރޭޝަނުން ހޯދަން އިއުލާންކުރި 32 އަހަރުގެ ހުސެއިން އަރަފާތު މިހާރުވަނީ ހައްޔަރުކޮށް، އިމިގްރޭޝަންގެ ބެލުމުގެ ދަށަށް ގެނެވިފައެވެ.

ނަމަވެސް އޭނާ ހައްޔަރުކުރެވުނު ތަނެއް ކޮންޓްރޯލާ ހާމައެއް ނުކުރެއްވިއެވެ.

ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނެފައިވަނީ އަރަފާތު ހައްޔަރުކުރެވުނީ މިއަދު ހެނދުނު 10:30 އެހާކަންހާއިރު މާލެއިން ކަމަށެވެ. އަދި މި މައްސަލައިގެ ތަހުގީގު ފުލުހުން މިހާރު ވަނީ ފަށައިފާކަމަށެވެ.

އިމިގްރޭޝަނުން ބުނެފައިވާ ގޮތުގައި އަރަފާތު ރާއްޖޭގައި އުޅެނީ ގަވާއިދާ ޚިލާފަށެވެ. އަދި ސޯޝަލް މީޑިއާގައި މީހުން ބުނަމުންދަނީ އޭނާއަކީ ދިރިއުޅޭ ގޭގައި ބާގާ ފަދަ ކާތަކެތި ހަދައި ފިހާރަތަކަށް ވިއްކައިގެން އާމްދަނީ ހޯދާ މީހެއް ކަމަށެވެ.

އިމިގްރޭޝަން ފުލުހުން