ސަން ސިޔާމްގެ އެހީގައި ކަމަދޫ ރައްޔިތުންނަށް ހިލޭ ބޭސްފަރުވާ ފޯރުކޮށްދެނީ

ބ. ކަމަދޫގެ ހުރިހާ ރައްޔިތުންނަށް ހިލޭ ބޭސްފަރުވާ ކުރެވޭނެ ގޮތް ސަން ސިޔާމް ރިސޯޓްސްގެ ވެރިޔާ އަދި ދ. މީދޫ ދާއިރާގެ މެންބަރު އަހުމަދު ސިޔާމް މުހައްމަދުގެ އެހީގައި ހަމަޖައްސައިދީފިއެވެ.

މި ކަން އިއުލާނުކޮށް ކަމަދޫ ކައުންސިލުން މިދިޔަ ހަފްތާގެ އަންގާރަ ދުވަހު ވަނީ އިއުލާނެއް ނެރެފައެވެ. އެ އިއުލާނުގައި ބުނެފައިވާ ގޮތުން ސަން ސިޔާމް ކެއާގެ ދަށުން ރާއްޖެއިންނާއި ރާއްޖެއިން ބޭރުން ބޭސްފަރުވާ ކުރުމަށް މާލީ އެހީތެރިކަން ބޭނުންވާ މީހުންނަށް ކަނޑައެޅޭ އުސޫލެއްގެ ދަށުން އެ އެހީތެރިކަން ދޭން ވަނީ ސިޔާމް ނިންމަވާފައެވެ.

މި އެހީގެ ދަށުން އެހީތެރިކަން ބޭނުންވާ މީހުންނަށް އެކަމަށް ޚާއްސަ ފޯމެއް ކައުންސިލުން ލިބެން ހުންނާނެ ކަމަށް އެ އިއުލާނުގައި ބުނެފައިވެއެވެ.

މި ކަމާ ގުޅޭގޮތުން ކަމަދޫ ކައުންސިލުން ވިދާޅުވެފައި ވަނީ އެ ރަށު ރައްޔިތުންނަށް ސިއްހީ ފަރުވާ ހޯދުމަށް ބޭނުންވާ އެހީތެރިކަން ސަން ސިޔާމް ކުންފުނިން ހަމަޖައްސައިދިނީ އެކަމާ ގުޅޭގޮތުން ކައުންސިލާއެކު މަޝްވަރާ ބައްދަލުވުންތަކެއް ބޭއްވުމަށް ފަހު ކަމަށެވެ.

މި ޕްރޮގްރާމްގެ ދަށުން އެހީ ލިބޭނެ މިންވަރާއި ހާލަތްތައް ކަނޑައަޅާނީ ސަން ސިޔާމް ކުންފުނިން ބަލަންޖެހޭ ކަންކަމަށް ބެލުމަށް ފަހު ކަމަށާއި، އަދި އެންމެ ބޭނުން ޖެހިފައިވާ މީހުންނަށް އެހީތެރިކަން ހޯދައިދޭން ކައުންސިލުން މަސައްކަތް ކުރާނެ ކަމަށް ވެސް ކައުންސިލުން ބުނެފައިވެއެވެ.