މަކުނުވިދުރި ބަލި ފެތުރޭ ޤައުމުތަކުން އަންނަ ފަސިންޖަރުން ސްކްރީން ކުރުމަށް ދަނީ ތައްޔާރުވަމުން: އެޗްޕީއޭ

މަކުނުވިދުރި ބަލި ފެތުރޭ ޤައުމުތަކުން އަންނަ ފަސިންޖަރުން އެއަރޕޯޓުގައި ސްކްރީން ކުރުމުގެ ތައްޔާރީތައް މިހާރު ދަނީ ކުރަމުންކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.

އެޗްޕީއޭގެ ފަރާތުން މިކަން ހާމަކޮށްފައިވަނީ ދުނިޔޭގެ އެކި ގައުމުތަކުގައި މިހާރު ފެތުރެމުން އަންނަ މަކުނުވިދުރިއާ ގުޅޭ ގޮތުން ދައުލަތުގެ މީޑިއާ ޕީއެސްއެމްގެ 'ރާއްޖެ މިއަދު' ޕްރޮގްރާމުގައި ރޭ ވާހަކަ ދައްކަވަމުންނެވެ.

އެޗްޕީއޭގެ ޕަބްލިކް ހެލްތު ޑިރެކްޓަރު ސަނާ ސަލީމް ވިދާޅުވި ގޮތުގައި، މަކުނުވިދުރި ފެތުރޭ ޤައުމަކަށް ދަތުރުކޮށްފައިވޭތޯ ބެލުމަށް އިމިގްރޭޝަން ފޯމުގައި ސުވާލު ހިމެނުމަށް ދަނީ މަސައްކަތް ކުރަމުންނެވެ. އަދި މި ބަލި ފެތުރޭ ޤައުމަކުން ނުވަތަ ބައްޔަށް ޕޮޒިޓިވް ވެފައިވާ މީހަކު ރާއްޖެއަށް އެތެރެވާ ހާލަތެއްގައި އެއަރޕޯޓުގައި ސްކްރީނިންގ ހެދޭނެ އިންތިޒާމުތައް ހަމަޖެއްސުމުގެ މަސައްކަތް ކުރަމުންދެއެވެ.

ހެލްތު މިނިސްޓްރީގެ ޑިރެކްޓަރ ޖެނެރަލް އޮފް ހެލްތު ޑރ. އަޙްމަދު އަޝްރަފް ވިދާޅުވި ގޮތުގައި، މި ބަލީގެ ކޭހެއް ފެނިއްޖެނަމަ އެކަން ބެލުމަށް ނިޒާމެއް ތައްޔާރުކުރަމުންދާއިރު، ހެލްތު އެމަޖެންސީ ކޮމިޓީއާއި ޓެކްނިކަލް އެޑްވައިޒަރީ ގްރޫޕް ވެސް މިހާރުވަނީ އެކުލަވާލެވިފައެވެ. އަދި ހޮސްޕިޓަލްތަކުގައި ވެސް މިފަދަ ކޭސްތައް އައިސޮލޭޓް ކުރެވޭނެ އިންތިޒާމު ހަމަޖައްސާފައިވެއެވެ.

މި ބައްޔަށް ޚާއްޞަ ފަރުވާއެއް ހޯދިފައި ނެތް ނަމަވެސް، ބަލި ޖެހިފައިވާ މީހާގެ ކިބައިން ފެންނަ އަލާމާތްތަކަށް ފަރުވާ ފޯރުކޮށްދެވޭނެ ކަމަށް ވެސް އެޗްޕީއޭއިން ބުނެފައިވެއެވެ.

އެފްރިކާގެ ބައެއް ޤައުމުތަކުން ފެނުނު މިބަލި ޖެހިފައިވާ ބައެއް މީހުން ދުނިޔޭގެ އެކި ޤައުމުތަކުން މިހާރު ފެންނަމުންދާކަން ފާހަގަކުރެވެއެވެ. މި ބަލީގެ ސަބަބުން ދުނިޔޭގެ ސިއްހަތު ޖަމުއިއްޔާއިން ވަނީ މުޅި ދުނިޔެއަށް ސިއްހީ ކުއްލި ހާލަތު އިއުލާނުކޮށްފައެވެ.