ރައީސްގެ ސިޓީފުޅު ސައުދީގެ ފޮރިން މިނިސްޓަރާއި ހަވާލުކުރައްވައިފި

ރާއްޖޭގެ ފޮރިން މިނިސްޓަރު މޫސާ ޒަމީރު، ސައުދީ އަރަބިއްޔާގެ ފޮރިން މިނިސްޓަރު ޕްރިންސް ފައިސަލް ބިން ފަރްހާން އަލްސައުދާ މިއަދު ބައްދަލުކުރައްވައި، ރައީސް ޑރ. މުހައްމަދު މުއިއްޒު ފޮނުއްވި ސިޓީފުޅެއް ހަވާލުކުރައްވައިފިއެވެ.

ފޮރިން މިނިސްޓްރީން މިރޭ ނެރުނު ބަޔާނެއްގައި ބުނެފައިވާ ގޮތުގައި، މި ބައްދަލުވުމުގައި ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިކުރުމާއި، އިގްތިސާދީ އަދި ބައިނަލްއަގްވާމީ މަސްރަހުގައި ގުޅުން ހަރުދަނާކުރުމާ ގުޅޭގޮތުން މަޝްވަރާކުރެވުނެވެ.

ރައީސް މުއިއްޒު ސައުދީގެ ވަލީއަހުދު މުހައްމަދު ބިން ސަލްމާންއަށް ފޮނުއްވާ ހާއްސަ ސިޓީއެއް ރައްދުކުރުމަށް ޒަމީރު އެ ގައުމަށް ވަޑައިގެންނެވީ އިއްޔެއެވެ. މިއީ ސައުދީ ފޮރިން މިނިސްޓަރުގެ ހާއްސަ ދައުވަތަކަށް ކުރައްވާ ފަސް ދުވަހުގެ ރަސްމީ ދަތުރުފުޅެކެވެ.

މި ދަތުރުފުޅުގައި ޒަމީރު ސައުދީ ސަރުކާރާއި ސައުދީ ފަންޑު ފޯ ޑިވެލޮޕްމެންޓްގެ އިސް ބޭފުޅުންނާ ބައްދަލުކުރެއްވުމަށް ވަނީ ހަމަޖެހިފައެވެ. އަދި ރިޔާދުގައި ދިރިއުޅޭ ދިވެހިންނާވެސް ބައްދަލުކުރެއްވުމަށް ވަނީ ހަމަޖެހިފައެވެ.

މި ދަތުރުފުޅުގެ ސަބަބުން ދެ ގައުމުގެ ދެމެދުގައި އޮތް އެކުވެރިކަމާއި ގުޅުން އިތުރަށް ބަދަހިވެ، އިގްތިސާދީ އަދި އެހެނިހެން ދާއިރާތަކުން އެއްބާރުލުން އިތުރުވެގެންދާނެ ކަމަށް ބެލެވެއެވެ.