މާދަމާއަށް ތާވަލުކުރި ކުރީގެ ރައީސް ޔާމީންގެ މައްޗަށް ކުރެވޭ ދައުވާގެ އަޑުއެހުން ފަސްކޮށްފި

ކުރީގެ ރައީސް ޔާމީން

ރ. ފުއްގިރި މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް ކުރެވޭ ދައުވާގެ ޝަރީއަތް މާދަމާ ބޭއްވުމަށް ހަމަޖެހިފައިވަނިކޮށް، މިއަދު އެ އަޑުއެހުން ކެންސަލްކޮށްފިއެވެ.

ކްރިމިނަލް ކޯޓުން މިރޭ މައުލޫމާތު ދިންގޮތުގައި، މާދަމާގެ އަޑުއެހުމަށް ދައުލަތުގެ ހެކިންނަށް ހާޒިރުނުވެވޭތީ، ދައުލަތުން އެދުމުން މި އަޑުއެހުން ވަނީ ފަސްކޮށްފައެވެ.

މި މައްސަލައިގައި ޔާމީންގެ މައްޗަށް ތުހުމަތުކުރެވެނީ ފުއްގިރި ކުއްޔަށް ދިނުމުގެ މުއާމަލާތާ ގުޅިގެން އެއް މިލިއަން ޑޮލަރު ރިޝްވަތުގެ ގޮތުގައި ބަލައިގަނެ، އެ ފައިސާ ލޯންޑަރކުރި ކަމަށެވެ. މި ޝަރީއަތުގެ އަޑުއެހުމެއް ގިނަ ދުވަސްތަކެއްގެ މެދުކެނޑުމަކަށްފަހު މާދަމާ ބޭއްވުމަށް ކުރިން އޮތީ އިއުލާންކޮށްފައެވެ.

ފުއްގިރި މައްސަލައިގައި ޔާމީންގެ އިތުރުން ސަން ކޮންސްޓްރަކްޝަން ކުންފުންޏާއި ސަން އިންޖިނިއަރިން ކުންފުނީގެ މައްޗަށްވެސް ދައުލަތުން ދައުވާ އުފުލާފައިވެއެވެ.

މާދަމައަށް ތާވަލުކުރި އަޑުއެހުން ކެންސަލުކުރި ނަމަވެސް ވ. އާރަށް މައްސަލައިގައި ޔާމީންގެ މައްޗަށް ކުރާ ރިޝްވަތާއި މަނީ ލޯންޑްރިންގެ ކުށުގެ ދައުވާގެ ޝަރީއަތް އަންނަ ބުދަ ދުވަހު ބޭއްވުމަށް ވަނީ ތާވަލުކޮށްފައެވެ.

މި މައްސަލައިގައި ޔާމީނާއި ރައްޔިތުންގެ މަޖިލީހުގެ ފެލިދޫ ދާއިރާގެ މެންބަރު ޔޫސުފް ނައީމްގެ މައްޗަށް ކުރިން 11 އަހަރުގެ ޖަލު ހުކުމެއް އިއްވާފައިވީ ނަމަވެސް، ހައިކޯޓުން ވަނީ އެ ހުކުމް ބާތިލުކޮށް، މައްސަލަ އަލުން ބެލުމަށް އަމުރުކޮށްފައެވެ.

ރައީސް ޔާމީން