ވިއްސާރައިން 13 ރަށެއްގެ 77 ގެއަކަށް ގެއްލުން ލިބުނު: އެންޑީއެމްއޭ

މިދިޔަ ހަފުތާގައި ކުރި ވިއްސާރައިގައި ރާއްޖޭގެ ގިނަ ރަށްތަަކަކަށް ތަފާތު ގެއްލުންތައް ލިބުނު

މިދިޔަ ހަފުތާއިން ފެށިގެން ރާއްޖެއަށް ކުރަމުންދާ ވިއްސާރައިގައި 13 ރަށެއްގެ 77 ގެއަކަށް ގެއްލުންވި ކަމުގެ ރިޕޯޓު ލިބިފައިވާ ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން މިއަދު ބުނެފިއެވެ.

އެއިދާރާއިން ހާމަކޮށްފައިވާ ގޮތުގައި މި ތަފާސް ހިސާބުތަކަކީ މިއަދުގެ މެންދުރު 2:00 އާ ހަމައަށް ލިބުނު އެސެސްމަންޓް ފޯމުތަކުގެ އަލީގައި ހާމަކޮށްފައިވާ މަޢުލޫމާތުތަކެކެވެ.

މި ވިއްސާރައިގެ އަސަރު އެންމެ ބޮޑަށް ކުރި ރަށްތަކުގެ ތެރޭގައި ހިމެނެނީ ހއ. ބާރަށާއި ހއ. ދިއްދު އާއި ހދ. ކުޅުދުއްފުށްޓާއި ޅ. ނައިފަރާއި އެ އަތޮޅު ކުރެންދޫގެ އިތުރުން ގއ. ދެއްވަދު އާއި ސ. މަރަދު އާއި ސ. ފޭދޫ އަދި ސ. ހިތަދޫ ކަމަށްވެސް އެންޑީއެމްއޭ ހާމަކުރައްވައެވެ.

މާލޭގައި ފެންބޮޑުވުމުގެ ސަބަބުން އެސެސްމަންޓް ހަދަންޖެހޭ ކަމަށް ފާހަގަކުރެވުނު 41 ގެއެއްގެ ތެރެއިން 37 ގެއެއްގެ އެސެސްމަންޓް ހަދައި ނިމިފައިވާ ކަމަށް ވެސް އެ އޮތޯރިޓީން ބުނެފައިވެއެވެ.

މިހާތަނަށް އެންޑީއެމްއޭ އަށް ލިބުނު ރިޕޯޓުތަކަށް ބަލާއިރު، ހަތަރު ގެއަކުން ވަނީ އެސެސްމަންޓް ހަދަން ބޭނުން ނުވާ ކަމަށް އެ އިދާރާ އަށް އަންގައިފަ އެވެ. މާލެ އަށް ކުރި ވިއްސާރާގައި އިމާރާތްތަކަށާއި ހިފައި ގެންގުޅޭ ތަކެއްޗަށް 819،549 ރުފިޔާގެ ގެއްލުން ލިބިފައިވާ ކަމަށް އެންޑީއެމްއޭ އިން ބުނެފައިވެއެވެ.

މޫސުން އެންޑީއެމްއޭ