ކާށިދޫ މުދިމު މަސްތުވާތަކެއްޗާއެކު ހައްޔަރުކޮށްފި

ކ. ކާށިދޫ މިސްކިތުގެ މުދިމް، 37 އަހަރުގެ ޣާނިމް ސަލީމް، މަސްތުވާތަކެއްޗާއެކު ރޭގެ ވަގުތެއްގައި ހައްޔަރުކޮށްފިއެވެ.

ފުލުހުން މަޢުލޫމާތު ދީފައިވާ ގޮތުގައި، ޣާނިމް ހައްޔަރުކުރެވުނީ މަގުމަތީގައި ހިންގުނު ބަލައި ފާސްކުރުމެއްގައި އޭނާގެ އަތުން މަސްތުވާތަކެތި ފެނުމާ ގުޅިގެންނެވެ.

ޣާނިމަކީ މިނިސްޓްރީ އޮފް އިސްލާމިކް އެފެއާޒްގެ އިމާމެއްގެ ގޮތުގައި ސިވިލް ސާވިސް ކޮމިޝަންގެ ދަށުން ވަޒީފާ އަދާކުރަމުންދިޔަ މީހެކެވެ. އޭނާގެ މައްޗަށް ކުރިން ވެސް ތުހުމަތުތަކެއް ކުރެވިފައިވެއެވެ. 2022 ވަނަ އަހަރުގެ ނޮވެމްބަރުގައި، ރަށުގެ ގިނަ އަދަދެއްގެ ރައްޔިތުން އޭނާ މަސްތުވާތަކެތި ބޭނުންކުރާ ކަމަށާއި، ނަމާދަށް ގަޑިއަށް ނާންނަ ކަމަށާއި، ނަމާދުގައި ކިޔާ ސޫރަތްތައް އޮޅުވާލާ ކަމަށް ބުނެ އިސްލާމިކް މިނިސްޓްރީއަށް ޕެޓިޝަނެއް ހުށަހެޅިއެވެ. މި ޝަކުވާއާ ގުޅިގެން އޭނާ ވަޒީފާއިން ވަކިކުރެވުނެވެ.

ނަމަވެސް، ޣާނިމް ވަޒީފާއާ ބެހޭ ޓްރައިބިއުނަލަށް މައްސަލަ ހުށަހެޅުމުން، އޭނާ ވަޒީފާއިން ވަކިކޮށްފައިވަނީ ޤާނޫނީ އިމުގެ ތެރެއިންކަން ސިވިލް ސާވިސް ކޮމިޝަނަށް ސާބިތުކޮށްދެވިފައި ނުވާކަމަށް ނިންމައި، އޭނާއަށް އަނބުރާ ވަޒީފާ ދީފައިވެއެވެ.