ކެއްސާތީވެދޭ 'ކޮފްސީ ސިރަޕް' ރާއްޖޭގައި ބޭނުންކުރުން ވަގުތީގޮތުން މަނާކޮށްފި

ރާއްޖެއަށް އެތެރެކޮށް ބޭނުންކުރަމުން އައި ކެއްސާތީވެދޭ 'ކޮފްސީ ސިރަޕް' އިން މައްސަލަތަކެއް ފާހަގަވެގެން އެ ބޭސް ރާއްޖޭގައި ބޭނުންކުރުމާއި އެތެރެކުރުން ވަގުތީގޮތުން މަނާކޮށްފިއެވެ.

މި ނިންމުން ނިންމާފައިވަނީ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިންނެވެ.

އެމްއެފްޑީއޭ އިން މިއަދު ނެރުނު ބަޔާނެއްގައި ބުނެފައިވަނީ، މި ސިރަޕުގައި ކުނޑިކޮޅުތަކެއް ހުންނަކަން ފާހަގަކުރެވިފައިވާ ކަމަށެވެ. އަދި މި ބޭހުގެ ރައްކާތެރިކަން ކަށަވަރުކުރުމަށްޓަކައި އިތުރަށް ބެލުމުގެ މަސައްކަތް އެ އޮތޯރިޓީން ދަނީ ކުރަމުން ކަމަށާއި، ދިމާވެފައިވާ މައްސަލަ ބެލުމަށްފަހު ވަކި ގޮތެއް އަންގަންދެން މި ބޭސް ރާއްޖެ އެތެރެކުރުމާއި ވިއްކުމާއި އަދި ބޭނުންކުރުމަކީ މަނާކަމެއް ކަމުގައި އެމްއެފްޑީއޭ އިން ބުނެފައިވެއެވެ.

'ކޮފްސީ ސިރަޕް' އަކީ އިންޑިއާގެ ޗެންނާއީއަށް ނިސްބަތްވާ 'އެމްއެމްސީ ހެލްތު ކެއާ' ނަމަކަށް ކިޔާ ކުންފުންޏަކުން އުފައްދާ ބޭހެކެވެ.

ރާއްޖެއަށް އެތެރެކުރާ ކެއްސާތީ ބޯ ބޭހުގެ ބާވަތްތަކަކީ އެމްއެފްޑީއޭ އިން ކުރަމުންދާ ތަހުލީލުތަކުގައި އާންމުކޮށް ވެސް މައްސަލަތައް ފާހަގަވާ ބޭސްތަކެކެވެ. މީގެ ކުރިން ވެސް ކެއްސާތީ ބޯ ބޭހުގެ ބައެއް ބްރޭންޑުތަކުގެ ބޭސްތަކުން މައްސަލަތައް ދިމާވެ ބައެއް ބޭސްތައް ރާއްޖެ އެތެރެކުރުން މަނާކޮށްފައި ވެސް ވެއެވެ.